ՀՀ նախագահ. ՀԱՊԿ–ը վերահաստատում է ղարաբաղյան հիմնախնդրի բացառապես խաղաղ լուծման անհրաժեշտությունը

ԵՐԵՎԱՆ, 14 հոկտեմբերի. /Նովոստի–Արմենիա/. ՀԱՊԿ պետությունների ղեկավարները Երևանում կայացած գագաթնաժողովի ժամանակ հայտարարություն են ընդունել ղարաբաղյան հակամարտության կարգավորման վերաբերյալ։

ՀՀ նախագահ Սերժ Սարգսյանը տեղեկացրեց, որ «ՀԱՊԿ Հավաքական անվտանգության խորհրդի նստաշրջանի ժամանակ վերահաստատվել է ղարաբաղյան հիմնախնդրի բացառապես խաղաղ լուծման անհրաժեշտությունը։ Գագաթնաժողովի մասնակիցներն աջակցություն են հայտնել ԵԱՀԿ ՄԽ համանախագահներին` միջազգային իրավունքի նորմերի և սկզբունքների, ՄԱԿ–ի կանոնադրության և Հելսինկյան եզրափակիչ ակտի հիման վրա, որոնք, մասնավորապես, վերաբերում են ուժ չկիրառելուն, ինչպես նաև պետությունների տարածքային ամբողջականությանը, իրավահավասարությանն ու ազգերի ինքնորոշման իրավունքին»։

«ՀԱՊԿ–ի գործընկերները աջակցություն են հայտնել պայմանավորվածություններին, որոնք ձեռք են բերվել այս տարի Վիեննայում և Սանկտ Պետերբուրգում կազմակերպված գագաթնաժողովների ժամանակ, որոնց նպատակն էր թույլ չտալ իրավիճակի սրում հակամարտության գոտում և պայմաններ ստեղծել խաղաղ գործընթացի առաջխաղացման համար», – նշեց ՀՀ նախագահը։

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-