ԵՐԵՎԱՆ, 7 հուլիսի. /Նովոստի-Արմենիա/. Հայաստանի ազգային հավաքականի ավագ, կիսապաշտպան Հենրիխ Մխիթարյանն իր առաջին հարցազրույցն է տվել «Մանչեսթեր Յունայթեդի» պաշտոնական ալիքին, հաղորդում է
armsport.am-ը` հղում անելով MUTV-ին:
- Բարի գալուստ, Հենրիխ: Ի՞նչ զգացողություններ ունես «Մանչեսթեր Յունայթեդի» հետ պայմանագիր կնքելուց հետո:
- Շնորհակալ եմ: Անչափ հուզված եմ: «Մանչեսթեր Յունայթեդում» հանդես գալն ինձ համար մեծ հնարավորություն և նոր մարտահրավեր է: Կներդնեմ բոլոր ուժերս:
- Որքանո՞վ ազդեց քո որոշման վրա Ժոզե Մոուրինյոյի գործոնը:
- Դա որոշից գործոններից մեկն էր, բայց կարևոր էր նաև այն, որ «Մանչեսթեր Յունայթեդը» հանդիսանում է աշխարհի մեծագույն ակումբներից մեկը: Ես չէի կարող մերժել այդ առաջարկը: Երջանիկ եմ, որ այստեղ եմ:
«Մանչեսթեր Յունայթեդը» հրապարակել է ակումբի հետ Մխիթարյանի պայմանագրի ստորագրման տեսանյութը>>
- Ոգևորվա՞ծ ես, որ հանդես ես գալու Ռունիի, Իբրահիմովիչի և մյուս աստղային ֆուտբոլիստների հետ:
- Այս տարի շատ լավ թիմ է հավաքվել և ես ուրախ եմ, որ խաղալու եմ նրանց հետ:
- Դու ծնվել ես մարզական ընտանիքում: Քո հայրը՝ Համլետը, նույնպես ֆուտբոլիստ է եղել: Ինչպիսի՞ ազդեցություն է նա ունեցել քո կարիերայի վրա: Որքա՞ն հպարտ կլիներ նա ներկա պահին:
- Երբ նա ֆուտբոլ էր խաղում, ես դեռ չէի կարող ամբողջովին հասկանալ, թե ինչ է ֆուտբոլը: Երբ նա մահացավ, ես ցանկացա ֆուտբոլիստ դառնալ: Ցանկանում էի շարունակել նրա գործը, և հույս ունեմ, որ ճիշտ ուղու վրա եմ:
- Նա հպարտ կլիներ քեզնով: Հանդես ես եկել Հայաստանում, որից հետո Ուկրաինայում և Գերմանիայում: Արդյո՞ք դու հասել ես քո կարիերայի գագաթնակետին:
- Հետ նայելով հասկանում եմ, որ երկար ճանապարհ եմ անցել: Գտնում եմ, որ կարող եմ շարունակել առաջընթաց գրանցել: Կարծում եմ, որ կյանքում ամեն ինչ ճիշտ եմ արել և հույս ունեմ, որ քայլ առ քայլ առաջ կշարժվեմ:
- Ինչպիսի՞ մարտահրավեր է քեզ սպասվում Պրեմիեր լիգայում:
- Բոլորն էլ գիտեն, որ Անգլիայի Պրեմիեր լիգան համարվում է աշխարհի լավագույն առաջնություններից մեկը: Երջանիկ եմ, որ կազմելու եմ դրա մասնիկը:
Մաուրինյո. Մխիթարյանն արտակարգ ֆուտբոլիստ է>>
- Խոսե՞լ ես Կագավայի ու Յանուզայի հետ «Մանչեսթեր Յունայթեդի» և Պրեմիեր լիգայի մասին:
- Յանուզայն իմ ընկերներից է: Այստեղ գալուց առաջ մենք նույնպես կապի մեջ ենք եղել: Նա միշտ հարցնում էր, թե արդյո՞ք միանալու եմ «Մանչեսթեր Յունայթեդին»: Ասում էի, որ ես էլ չգիտեմ, բայց վերջապես այստեղ եմ: Հուսով եմ, որ նա ինձ համար կլինի և՛ ընկեր, և՛ օգնական:
- Հպա՞րտ ես, որ առաջին հայն ես, ով հանդես է գալու Անգլիայի Պրեմիեր լիգայում: Ինչպե՞ս են վերաբերվում քո տեղափոխությանը Հայաստանում:
- Կարծում եմ, որ շատերն են սպասել այս տրանսֆերին: Ուրախ եմ, որ Հայաստանում հպարտ են ինձնով: Ինձ համար նույնպես մեծ պատիվ է լինել առաջին հայ ֆուտբոլիստն Անգլիայում: Կփորձեմ արդարացնել բոլորի սպասելիքները:
- «Մանչեսթեր Յունայթեդը» Հայաստանում մե՞ծ համբավ ունի:
- Կարծում եմ, որ ամենահայտնի ակումբներից մեկն է:
- Քո գործողություններին առաջին անգամ կհետևենք Չինաստանում, որտեղ «Մանչեսթեր Յունայթեդի» առաջին մրցակիցը կլինի Դորտմունդի «Բորուսիան»: Ի՞նչ տպավորություններ ունես այդ առիթով:
- Մի փոքր տարօրինակ կլինի հանդիպել իմ նախկին թիմակիցներին հատկապես առաջին խաղում: Ամեն դեպքում, «Մանչեսթեր Յունայթեդն» իմ նոր թիմն է և ես պետք է հարմարվեմ դրան:
«Մանչեսթեր Յունայթեդը» պաշտոնապես ներկայացրել է Մխիթարյանին` որպես «կարմիր սատանաների» խաղացող>>
- Դրանից հետո դուք պետք է հանդիպեք «Մանչեսթեր Սիթիին»: Առաջիկա շրջագայությունը քեզ համար նոր փորձ կլինի: Պատրա՞ստ ես նոր փորձության:
- Լսել եմ այդ ամենի մասին: Գտնում եմ, որ պատրաստ կլինեմ:
- Երկրպագուներն ի՞նչ ակնկալիքներ սպասեն քեզնից գալիք մրցաշրջանում:
- Ամեն ինչ կանեմ իմ լավագույն խաղը ցուցադրելու համար: Այն գոլերն ու գոլային փոխանցումները, որոնք գրանցել եմ նախորդ մրցաշրջանում, կփորձեմ անել նաեւ գալիք մրցաշրջանում:
- Ի՞նչ զգացողություններ կունենաս «Օլդ Թրաֆորդ» մարզադաշտում խաղալիս:
- Դեռ չեմ խաղացել «Օլդ Թրաֆորդ» մարզադաշտում, բայց գտնում եմ, որ սա աշխարհի ամենահրաշալի մարզադաշտերից մեկն է: Ինձ համար հետաքրքիր կլինի հանդես գալ այդ խաղադաշտում:
- Ի՞նչ կցանկանաս փոխանցել «Մանչեսթեր Յունայթեդի» երկրպագուներին, որոնք անհամբերությամբ սպասում են քո նորամուտին:
-Սիրելի´ երկրպագուներ, ուրախ կլինեմ տեսնել ձեզ մարզադաշտում յուրաքանչյուր խաղին և ամեն ինչ կանեմ, որպեսզի օգնեմ «Մանչեսթեր Յունայթեդին» հաղթել։ -0-
