ԵՐԵՎԱՆ, 20 սեպտեմբերի. /Նովոստի–Արմենիա/. Նախօրեին երեկոյան ՀՀ ԱԻՆ–ը ահազանգ է ստացել այն մասին, որ Բրազիլիայի 24–ամյա քաղաքացին մոլորվել է Սևաբերդ գյուղից դեպի Ակնալիճ տանող լեռնային հատվածում։
ՀՀ ԱԻՆ Փրկարար ծառայության հաղորդմամբ, սեպտեմբերի 19-ին ժամը 21:10-ին «911» ծառայությանն ահազանգ է ստացվել, որ Բրազիլիայի Դաշնային Հանրապետության քաղաքացին մոլորվել է Կոտայքի մարզի Սևաբերդ գյուղից դեպի Ակնալիճ տանող լեռնային հատվածում, անհրաժեշտ է փրկարարների օգնությունը:
Դեպքի վայր է մեկնել ՀՀ ԱԻՆ ՓԾ հատուկ նշանակության փրկարարական աշխատանքների իրականացման կենտրոնի փրկարարական ջոկատը:
Ժամը 21:20-ին կապ է հաստատվել մոլորված քաղաքացի Քերն Թամիրիսի (1994 թ.) հետ և ճշտվել GPS կոորդինատները:
«Փրկարարները Սևաբերդ գյուղում հանդիպել են մոլորված քաղաքացուն և տեղափոխել ՀՆՓԱԻ կենտրոն», – նշվում է գերատեսչության հաղորդագրության մեջ։–0–