Առեղծվածային դեպք մատուռի մոտ․ 34-ամյա տղամարդն ու 28-ամյա կինը միմյանց վրա աղաթթու են լցրել

ԵՐԵՎԱՆ, 2 դեկտեմբերի․ /Նովոստի-Արմենիա/․ Երեկ՝ նոյեմբերի 30-ին, արտակարգ դեպք է տեղի ունեցել Արագածոտնի մարզում:

Ինչպես հայտնում է shamshyan.com-ը, ժամը 06:00-ի սահմաններում, այրվածքների գիտահետազոտական կենտրոնից ոստիկանության Երևան քաղաքի վարչության օպերատիվ կառավարման կենտրոն ահազանգ է ստացվել, որ «մարմնի 20 տոկոս քիմիական այրվածք, 2.3 աստիճանի, դեմքի պարանոցի, որովայնի վերին ստորին վերջույթների» ախտորոշմամբ իրենց մոտ է տեղափոխվել մի քաղաքացի:

Ըստ աղբյուրի, հիվանդանոց մեկնած ոստիկանության ծառայողները պարզել են, որ վիրավորը Երևան քաղաքի բնակիչ, 34-ամյա Ն.Ս.-ն է, ով ոստիկաններին հայտնել է, որ այրվածքները ստացել է Արագածոտնի մարզի Ապարանի լճի տարածքում գտնվող եկեղեցու մոտ:

Ժամը 06:30-ի սահմաններում, նույն գիտահետազոտական կենտրոն է տեղափոխվում Երևանի բնակչուհի, 28-ամյա Գ.Ա.-ն: Ըստ տեղեկությունների, վերջինս ստացել է «դեմքի պարանոցի և ձախ վերջույթի 2.3 աստիճանի քիմիական այրվածք»:

Հիվանդանոցում բժիշկները ոստիկաններին հայտնել են, որ նշված անձինք ի վիճակի չեն կատարվածի մասին բացատրություն տալու: Փաստի առթիվ նյութերը փոխանցվել են ոստիկանության Ապարանի բաժին, որտեղ՝ ձեռնարկելով անհրաժեշտ միջոցառումներ, պարզել են, որ նույն օրը՝ գիշերը ժամը 03:00-ի սահմաններում, Թթուջուր վարչական տարածքում գտնվող «Մուրութի վանք» կոչվող մատուռի մոտ, քննությամբ դեռևս չպարզված հանգամանքներում Ն.Ս.-ն և Գ.Ա.-ն միմյանց վրա լցրել են աղաթթու (կիսլատա) և ստացել այրվածքներ:-0-