ԵՐԵՎԱՆ, 21 նոյեմբերի. /Նովոստի-Արմենիա/. Ձեռնարկված միջոցառումների արդյունքում Լոռու մարզային քննչական վարչությունում պարզվել է երիտասարդին կյանքի հետ անհամատեղելի մարմնական վնասվածքներ պատճառելու շարժառիթը, հայտնում է ՀՀ ՔԿ մամուլի ծառայությունը:
Վանաձորում հայտնաբերվել է 21–ամյա երիտասարդի դի` սուր կտրող-ծակող գործիքից ստացած վնասվածքներով>>
Նախօրեի երեկոյան ոստիկանության Լոռու մարզային վարչության օպերատիվ կառավարման կենտրոն ահազանգ էր ստացվել, որ Վանաձոր քաղաքի Երևանյան խճուղու 88 հասցեի՝ վանաձորցիներին հայտնի «Ծառի մոտ» հատվածում, երիտասարդ տղայի դի կա։
Լոռու մարզային քննչական վարչությունում հարուցվել է քրեական գործ՝ Վանաձոր քաղաքի բնակիչ Հարություն Աղաջանյանի սպանության դեպքի առթիվ։ Ձեռնարկված անհետաձգելի մեծածավալ քննչական գործողությունների արդյունքում պարզվել է առերևույթ հանցագործություն կատարած անձի ինքնությունը, ով ձերբակալվել է։
Մահացածը 1995 թվականի ծնված, Վանաձոր քաղաքի բնակիչ Հարություն Աղաջանյանն էր, ում դին հայտնաբերել էին` ծակած-կտրած վերքերով:
Անմիջապես դեպքի վայր է մեկնել քննչական-օպերատիվ խումբը՝ ՀՀ քննչական կոմիտեի Լոռու մարզային քննչական վարչության պետ Թ.Շուշանյանի գլխավորությամբ։ Կատարվել է դեպքի վայրի զննություն։
Դեպքի առթիվ 2016 թվականի նոյեմբերի 21-ին ՀՀ քննչական կոմիտեի Լոռու մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին մասով (սպանություն), մշակվել քննչական պլան:
Գերատեսչության հաղորդագրության համաձայն, ձեռնարկված միջոցառումների արդյունքում պարզվել է, որ երիտասարդին կյանքի հետ անհամատեղելի մարմնական վնասվածքը պատճառվել է ավտոտեխսպասարկման կայանի մոտ կենցաղային հարցերի շուրջ տեղի ունեցած վիճաբանության ժամանակ։
Պարզվել է առերևույթ հանցագործություն կատարած անձի ինքնությունը, ով ևս Վանաձոր քաղաքի բնակիչ է, 22 տարեկան։ Կասկածյալը ձերբակալվել է և ցուցմունք տվել դեպքի շուրջ։ -0-
