ԵՐԵՎԱՆ, 22 ապրիլի. /Նովոստի–Արմենիա/. Նիգերիայում ողբերգություն է տեղի ունեցել Եվրոպա լիգայի քառորդ եզրափակչի՝ «Մանչեսթեր Յունայթեդ»-«Անդերլեխտ» պատասխան խաղի ժամանակ (2:1):
Ինչպես տեղեկացնում է armsport–ը, հղում անելով «Mirror»-ին, Քալաբար քաղաքի համատեղ դիտման կենտրոններից մեկում ավելի քան 30 մարդ է զոհվել էլեկտրական հոսանքի հարվածից:
Հենրիխ Մխիթարյանը բացել է հաշիվը ՄՅՈւ– «Անդերլեխտ» պատասխան խաղում (ՏԵՍԱՆՅՈՒԹ)>>
Աղբյուրի փոխանցմամբ, միջադեպը տեղի է ունեցել այն պատճառով, որ էլեկտրական լարերից մեկը, որը շատ մոտ է գտնվել հանդիսատեսի կենտրոնին, խաղի ժամանակ ընկել է հաստատության վրա:
«Մանչեսթեր Յունայթեդը» Twitter պաշտոնական էջում ցավակցություն է հայտնել զոհվածների հարազատներին և ընկերներին:
Facebook–յան իր էջում այս կապակցությամբ գրառում է կատարել նաև Հենրիխ Մխիթարյանը` նշելով, որ խորապես վշտացած է Նիգերիայում տեղի ունեցած ողբերգության կապակցությամբ։
«Աղոթում եմ մեր երկրպագուների հավերժ հանգստության համար և տոկունություն եմ մաղթում ողբերգության հետևանքով տուժածներին», – նշել է Մխիթարյանը։–0–