ԵՐԵՎԱՆ, 8 հունվարի. /Նովոստի-Առմենիա/. Ղազախստանի Կարագանդա քաղաքում տեղի ունեցած սպանության մեջ կասկածվող Նարեկ Գուրուրյանը, ում նկատմամբ հետախուզում է հայտարարվել, փախել է Ռուսաստան: Ղազախական օպերատիվ- քննչական խմբերն ուղարկվել են Ռուսաստան և Հայաստան։ Այդ մասին Աստանայում տեղի ունեցած ճեպազրույցի ժամանակ հայտարարել է Ղազախստանի ներքին գործերի առաջին փոխնախարար Ժանատ Սուլեյմենովը, փոխանցում է kaztag.kz-ը:
Ինչպես հաղորդել էինք ավելի վաղ, հունվարի 1–ի գիշերը Կարագանդա քաղաքի «Հին Հռոմ» ռեստորանում կենցաղային հողի վրա տեղի է ունեցել ծեծկռտուք ռեստորանի այցելուների միջև, ինչի հետևանքով տղամարդ է մահացել, երեք մարդ վիրավորվել է։ Ղազախական ԶԼՄ–ների հաղորդմամբ, փաստի առթիվ իրականացվում է նախաքննություն ՔՕ 99–րդ հոդվածի 1–ի մասին հատկանիշներով (սպանություն)։ Կարագանդայի ոստիկանների կողմից հետախուզում է հայտարարվել Գուրուրյան Նարեկի նկատմամբ։
Նա նշել է, որ «քննության տրամադրության տակ են տեսաձայնագրություններ, տուժածների հարցաքննությունները, առերեսումներ»:
Սուլեյմենովը նաև նշել է, որ քննության ընթացքում պարզվել է, որ միջադեպը կրում է զուտ կենցաղային բնույթ:
Загружается новость ... "Лево"
«Այստեղ չեն դիտարկվում ազգամիջյան կոնֆլիկտի հարցեր: Դա պետք է հատուկ շեշտել», - ասել է նա:
Կարագանդայի ռեստորանում տեղի ունեցած ողբերգությունը և մի քանի օր անց կազմակերպված հանրահավաքները դարձել են քննարկման առարկա Հայաստանի և Ղազախստանի ԱԳՆ–ների և ուժային գերատեսչությունների մակարդակով։ Այսօր տեղի ունեցած հեռախոսազրույցի ընթացքում ՀՀ ԱԳ նախարարի պաշտոնակատար Զոհրաբ Մնացականյանն ու Ղազախստանի ԱԳ նախարար Բեյբութ Ատամկուլովն
անթույլատրելի են համարել կենցաղային հողի վրա տեղի ունեցած ողբերգությանն ազգամիջյան ներբերանգ տալու փորձերը։
Ղազախստանի Հանրապետության ներքին գործերի նախարար, գեներալ-գնդապետ Կալմուխանբետ Կասիմովը ՀՀ ոստիկանապետ Վալերիյ Օսիպյանի հետ հեռախոսազրույցի ընթացքում վստահեցրել է, որ անցկացվելու է արդար քննություն և դրա շրջանակում բոլոր գործողություններն իրականացվելու են օրենքի տառին համապատասխան:
Ղազախական ԶԼՄ–ների հաղորդմամբ, փաստի առթիվ սկսվել է նախաքննություն «Սպանություն» հոդվածով։ Tengrinews.kz պորտալի հաղորդմամբ, ձերբակալվել է 7 կասկածյալ (նրանցից հինգը կալանավորվել է), մեկ կասկածյալի նկատմամբ հայտարարվել է միջազգային հետախուզում։ Աղբյուրի տվյալներով, Կարագանդայի մարզի ոստիկանությունում սկսվել է նախաքննություն «Սոցիալական, ազգային, տոհմական, ռասայական, հասարակարգային կամ կրոնական թշնամության հրահրում» հոդվածով։
Zakon.kz կայքն ավելի վաղ հաղորդել էր, որ օպերատիվ–հետախուզական միջոցառումների արդյունքում ոստիկանները ձերբակալել են երեք տղամարդու` Մալխասյան Թորգոմ, Մալխասյան Սոխակ, Նադիրբեկով Կաիր։ Նրանք կասկածվում են ծանր հանցագործություն կատարելու մեջ, Կարագանդայի դատարանը նրանց նկատմամբ որպես խափանման միջոց ընտրել է կալանքը։ Կարագանդայի ոստիկանների կողմից հետախուզում է հայտարարվել Գուրուրյան Նարեկի նկատմամբ։– 0–
