ԵՐԵՎԱՆ, 9 դեկտեմբերի. /Նովոստի–Արմենիա/. ԳԴՀ կանցլեր Անգելա Մերկելը «Տարվա մարդ» անվանակարգի հաղթող է ճանաչվել ամերիկյան
Time ամսագրի վարկածով։
«Տարվա մարդ» անվանակարգը նշում է այն մարդկանց, ովքեր, ամերիկյան Time ամսագրի գլխավոր խմբագրի կարծիքով, առավել մեծ ազդեցություն են գործել ավարտվող տարում աշխարհում կատարվող իրադարձությունների վրա լավ կամ վատ իմաստով։ «Տարվա մարդու» հայտարարումը կատարվել է NBC ալիքով հեռարձակվող առավոտյան Today շոուի եթերում։
Բացի Մերկելից, մարդու տարվա կոչման համար պայքարում էին Ռուսաստանի նախագահ Վլադիմիր Պուտինը, Իրանի նախագահ Հասան Ռոուհանին, ՌԴ–ում արգելված «Իսլամական պետություն» ահաբեկչական խմբավորման առաջնորդ Աբու Բաքր ալ Բաղդադին, ԱՄՆ նախագահի թեկնածու Դոնալդ Տրամպը, ինչպես նաև Black Lives Matter կազմակերպության ակտիվիստները, ովքեր պայքարում են աֆրոամերիկացիների իրավունքների համար, հայտնում է
ՌԻԱ Նովոստին։
ԳԴՀ կանցլեր Անգելա Մերկելն ընդգրկվել է նոմինանտների ցուցակում, քանի որ տարվա ընթացքում միշտ եղել է քաղաքական և տնտեսական իրադարձությունների կենտրոնում, բայց միաժամանակ քննադատության է ենթարկվել միգրանտների հետ կապված ճգնաժամի պատճառով։
Time–ի վարկածով «Տարվա մարդը» որոշվում է ամեն տարի դեկտեմբերին պարբերականի գլխավոր խմբագրի կողմից` սկսած 1927 թվականից։ Ընդհուպ մինչև 1950 թվականն անվանակարգի հավակնորդ էին կոնկրետ մարդիկ, սակայն հետագայում կոչման արժանացել են նաև վերացական կերպարներ։ 2014 թվականին «Տարվա մարդ» տիտղոսին արժանացել են Էբոլա մահացու վիրուսով հիվանդների խնամող մարդիկ։ Այդ կոչմանն արժանացած առաջին մարդն ամերիկացի օդաչու Չարլզ Լինդբերգն էր, ով պատմության մեջ առաջին անգամ մենակ ինքնաթիռով անցել է Ատլանտյան օվկիանոսի վրայով։ -0-