ԵՐԵՎԱՆ, 19 ապրիլի./Նովոստի–Արմենիա/. Հայազգի 5 գործարարներ, այդ թվում` Սամվել Կարապետյանը, եղբայրներ Նիկոլայ և Սերգեյ Սարկիսովները, Ռուբեն Վարդանյանն ու Ալբերտ Ավդոլյանը, ներառվել են ՌԴ–ի 200 ամենահարուստ գործարարների Forbes–ի վարկանիշում։
Forbes–ի ռուսական տարբերակի տվյալների համաձայն, հայազգի գործարարների ընդհանուր ունեցվածքը գնահատվում է մոտ 6,8 մլրդ դոլար։
Forbes–ի տվյալներով, ռուսաստանաբնակ հայազգի գործարար, «Տաշիր» խմբի սեփականատեր Սամվել Կարապետյանը զբաղեցրել է վարկանիշի 30–րդ հորիզոնականը, նա ամենամեծ ունեցվածքի սեփականատերն է վարկանիշում ներառված բոլոր հայերից։ Կարապետյանի ընդհանուր ունեցվածքը գնահատվել է 3,7 մլրդ դոլար, այն ավելացել է 0,3 մլրդ դոլարով` նախորդ տարվա համեմատ։
Загружается новость ... "Лево"
«Վարդանյան, Բրոյթման և գործընկերներ» ներդրումային ընկերության համահիմնադիր և Ռուսաստանում ու Հայաստանում իրականացվող բազմաթիվ նախագծերի հիմնադիր Ռուբեն Վարդանյանը զբաղեցրել է 109–րդ տեղը Ռուսաստանի 200 ամենահարուստ գործարարների 2018 թ.–ի վարկանիշում։ Գործարարի ընդհանուր ունեցվածքը գնահատվում է 950 մլն դոլար։
«ՌԵՍՈ–Գարանտիայի» փոխնախագահ Նիկոլայ Սարկիսովը (750 մլն դոլար) զբաղեցրել է 141–րդ հորիզոնականը։ Նրա կրտսեր եղբայրը` «ՌԵՍՈ–Գարանտիայի» նախագահ Սերգեյ Սարկիսովը, նույն ծավալի կապիտալով զբաղեցրել է 142–րդ հորիզոնականը։
«Telconet» հիմնադրամի համասեփականատեր Ալբերտ Ավդոլյանը զբաղեցնում է վարկանիշի 146–րդ հորիզոնականը։ Գործարարի ընդհանուր ունեցվածքը գնահատվում է 700 մլն դոլար։
«Ռուսաստանի 200 ամենահարուստ գործարարները» Forbes –ի 2018 թ.–ի վարկանիշը գլխավորել է Նովոլիպեցկի մետաղագործական կոմբինատի տնօրենների խորհրդի նախագահ Վլադիմիր Լիսինը (19,1 մլրդ դոլար), երկրորդ տեղում է «Սեվերստալի» սեփականատեր Ալեքսեյ Մորդաշովը (18,7 մլրդ դոլար)։ Երկրի ամենահարուստ գործարարների եռյակը եզրափակում է «Նովատէկի» վարչության նախագահ Լեոնիդ Միխելսոնը` 18 մլրդ դոլարով, նա մեկ տարում կորցրել է 400 մլն դոլար։
Forbes–ը նշում է, որ չնայած շուկայի լճացմանն ու արևմտյան նոր պատժամիջոցների սպասմանը, շուկայի դերակատարների մեծամասնության համար 2017 թվականը հաջող էր։ 200 ամենահարուստ ձեռներեցների ընդհանուր ունեցվածքն աճել է 25 մլրդ դոլարով` հասնելով 485 մլրդ դոլարի, իսկ միլիարդատերերի թիվն ավելացել է` 96–ից դառնալով 106։–0–