Հայաստանը ռուս զբոսաշրջիկների համար ԱՊՀ ամենահեռանկարային երկրների թոփ–եռյակում է

ԵՐԵՎԱՆ, 31 մարտի. /Նովոստի-Արմենիա/.  Հայաստանը 2016 թ.–ին զբաղեցնում է երրորդ տեղը ԱՊՀ երկրների վարկանիշային աղյուսակում` ըստ ռուսների շրջանում զբոսաշրջության և հանգստի հանրաճանաչության աճի, հայտնում է Travel.ru–ն:

2015թ.–ին Հայաստան է այցելել 1,2 մլն զբոսաշրջիկ, որոնցից ավելի քան 500 հազարը` Ռուսաստանից: Զբոսաշրջիկներն ամենից շատ այցելում են Երևան, Ջերմուկ, Ծաղկաձոր և Սևան:

Ըստ ռուսների շրջանում զբոսաշրջության հանրաճանաչության աճի` ԱՊՀ երկրների լավագույն հնգյակում են նաև Ադրբեջանը, Ղազախստանը, Ղրղըզստանը և Բելառուսը:

Ղազախստանում, ուր տարեկան այցելում է մոտ մեկ միլիոն զբոսաշրջիկ, առավել հանրաճանաչ են Աստանան, Ալմաթին, Կոկչետավը/Կոկշետաուն, Թուրքեստանը, լեռնադահուկային հանգստավայր Չիմբուլակը և Բորովոե հանգստավայրը: Հաջորդ տարի Աստանայում կանցկացվի EXPO-2017 ցուցահանդեսը:

Դուք տոլմա չեք սիրու՞մ կամ չեք կարողանում պատրաստե՞լ>>

Ադրբեջանում, որը 2015թ.–ին ընդունել է ավելի քան 2 մլն զբոսաշրջիկ, որոնցից 685 հազարը` Ռուսաստանից, առավել հանրաճանաչ են մայրաքաղաք Բաքուն, լեռնադահուկային հանգստավայրերը, ինչպես նաև Գյոյգյոլ լիճը և Կասպից ծովի լողափերը: 

Ղրղըզստանում, ուր նախորդ տարի այցելել է ավելի քան 1,2 մլն զբոսաշրջիկ, ռուսները գնում են Բիշկեկ, Իսսիկ Կուլ լիճ և լեռնադահուկային հանգստավայր Կարակոլ:  

Հայաստանում տարածված «ֆաստֆուդի» հնգյակը>>

Բելառուսում, ուր 2015թ.–ին այցելել է 300 հազար զբոսաշրջիկ, որոնց կեսից ավելին` Ռուսաստանից, այցելում են հիմնականում Մինսկ, Վիտեբսկ, Գոմել, Գրոդնո, Բրեստ, լեռնադահուկային հանգստավայր Լոգոիսկ և Նարոչ լիճ:

Վարկանիշային աղյուսակը կազմվել է նախորդ տարվա ընթացքում ինքնուրույն ճամփորդող զբոսաշրջիկների կողմից հյուրանոցների և բնակարանների ամրագրման աճի տվյալների հիման վրա: Travel.ru-ի տվյալների համաձայն` ԱՊՀ երկրներում հանգիստը օրական կազմում է միջինը 3 հազար ռուբլի: 

ԱՊՀ երկրները ռուս զբոսաշրջիկների համար գրավիչ են հանգստի ոչ բարձր գների, զարգացած ենթակառուցվածքի, առանց վիզայի մուտքի շնորհիվ։ Այդ երկրները գրավում են նաև ռուսներին այն պատճառով, որ տեղացիներից շատերը տիրապետում են ռուսերենին: –0–