ԵՐԵՎԱՆ, 6 սեպտեմբերի. /Նովոստի-Արմենիա/. Հայաստանից ռուսական շուկա գինու արտահանումը, նախորդ տարվա համապատասխան ժամանակահատվածի հետ համեմատ, 2016 թ.-ի առաջին կիսամյակում աճել է 20,5 տոկոսով` հասնելով 604,2 հազար լիտրի: Այդ մասին
հաղորդում է «ԱՌԿԱ» գործակալությունը` հղում անելով Հայաստանի մաքսային ծառայության տվյալներին:
Ընդ որում, գերատեսչության տվյալներով, 2016 թ.-ի հունվար-հուլիս ամիսներին Ռուսաստան արտահանվող հայկական գինու մաքսային արծեքը կազմել է 1,8 մլն դոլար` 2015 թ.-ի նույն ժամանակահատվածի 1,2 մլն դոլարի դիմաց:
Հաշվետու ժամանակահատվածում Հայաստանը ավելացրել է նաև ռուսական շուկա արտահանվող 80 տոկոսից պակաս թնդություն ունեցող էթիլ սպիրտի ծավալները` 2,2 մլն լիտրից (29,8 մլն դոլար) մինչև 8,87 մլն լիտր (60,8 մլն դոլար):
Ընդհանուր առմամբ, 2016 թ.-ի առաջին կիսամյակում հայկական գինու համախառն արտահանումը 2015 թ.-ի առաջին կիսամյակի համեմատ աճել է 24,7 տոկոսով` մինչև 779,9 հազար լիտր, իսկ 80 տոկոսից ցածր թնդություն ունեցող էթիլ սպիրտի արտահանման ծավալը` 2,2 անգամ` մինչև 10 մլն լիտր:
Միաժամանակ, 2015 թ.-ի ընթացքում գրանցվել է Հայաստանից գինու և 80 տոկոսից ցածր թնդություն ունեցող էթիլ սպիրտի արտահանման անկում` կապված ռուսական շուկայի բարդ իրավիճակի հետ, քանի որ հայկական ալկոհոլի արտահանման ճնշող մեծամասնությունը բաժին է ընկնում հենց Ռուսաստանին:
Ռուբլու կտրուկ արժեզրկման հետևանքով հայ ձեռնարկատերերի արտադրանքն ուղղակի շահավետ չէր ռուսական շուկայում: Այդպես, 2015 թ.-ին գինու արտահանումը կրչատվել է 31,5 տոկոսով` մինչև 1 451,6 հազար լիտր, իսկ 80 տոկոսից ցածր թնդություն ունեցող էթիլ սպիրտի արտահանումը` 8,4 տոկոսով: -0-