ԵՐԵՎԱՆ, 23 սեպտեմբերի. /Նովոստի–Արմենիա/. ՀՀ էկոնոմիկայի նախարարի պաշտոնակատար Արծվիկ Մինասյանն ուրբաթ լրագրողներին հայտարարեց, որ աշխատանքի նոր առաջարկ է ստացել ՀՀ նոր կառավարության կազմում։
Ըստ լրատվամիջոցների` Արծվիկ Մինասյանը կհեռանա էկոնոմիկայի նախարարի պաշտոնից և կզբաղեցնի բնապահպանության նախարարի պաշտոնը։
«Եղել է տարբեր ուղղությունների առաջարկ, և ես, որպես ՀՅԴ–ից առաջադրված թեկնածու, մտադիր եմ այդ առաջարկը ներկայացնել Գերագույն խորհրդի քննարկմանը, ինչից հետո կընդունվի վերջնական որոշում», – ասաց Մինասյանը։
Նա, սակայն, չնշեց, թե կոնկրետ ինչ ուղղություն է նրան առաջարկվել` ընդգծելով, որ դրա մասին հայտնի կդառնա ՀՅԴ Գերագույն խորհրդի որոշումից հետո։
Նա նշեց, որ կշարունակի կատարել իր պարտականությունները էկոնոմիկայի նախարարի պաշտոնակատարի պաշտոնում մինչև նախարարությունը ձևափոխվի և դառնա Ներդրումների և ձեռնարկատիրության աջակցության նախարարություն ու նախագահի հրամանագրով այդ պաշտոնում նշանակվի նոր նախարար։
Մինասյանը պարզաբանեց, որ չի կարող մնալ այդ պաշտոնում, քանի որ համաձայն չի նախարարության ձևափոխման հետ կապված մոտեցումների հետ, որի անվանման մեջ, նրա կարծիքով, պարտադիր պետք է լինի «էկոնոմիկա» բառը։
Տեղի են ունեցել լուրջ կառուցվածքային փոփոխություններ նախարարություններում և գերատեսչություններում>>
«Բացի այդ, վարչապետը ցանկություն էր հայտնել այդ պաշտոնում տեսնել ուրիշ մարդու, իսկ ես չեմ ձգտում պահել աթոռը ցանկացած գնով, քանի որ ՀՅԴ–ի համար ոչ մի պաշտոն ինքնանպատակ չէ, հիմնական խնդիրն աջակցությունն է քաղաքական համաձայնագրի հիմնական նպատակների և խնդիրների իրականացման գործում, որոնք բխում են սահմանադրական փոփոխություններից և թույլ են տալիս ապահովել երկրի զարգացումը», – ասաց Մինասյանը։
Նա նաև նշեց, որ այս պահին շարունակում է կատարել իր պարտականությունները։
«Ես չեմ հավաքել իրերս, ինչպես պնդում են որոշ լրատվամիջոցներ, և բոլոր ցանկացողները կարող են գալ իմ կաբինետ և համոզվել», – ասաց էկոնոմիկայի նախարարի պաշտոնակատարը։
Նա նաև ընդգծեց, որ անկախ նրանից, թե ինչ նախարարություն է գլխավորում` հիմնական շեշտը դրվելու է երկրի զարգացման ապահովման վրա։
Նա շնորհակալություն հայտնեց բոլորին, ովքեր աջակցել են իրեն նախարարի պաշտոնում լինելու ժամանակ` ընդգծելով, որ պրոֆեսիոնալ շրջանակները կգնահատեն գործունեությունը։
«Ուրախ կլինեմ շարունակել համագործակցությունը` ի բարօրություն երկրի», – ասաց Մինասյանը։
Կառուցվածքային փոփոխությունների արդյունքում` Էկոնոմիկայի նախարարության լիազորությունները կրճատվում են, նախարարության կառուցվածքից դուրս են գալիս զբոսաշրջության, ավիացիայի ոլորտներն ու այլ բնագավառներ։ –0–