ԵՐԵՎԱՆ, 2 մայիսի./Նովոստի–Արմենիա/. Երևանում շարժական սրճարանների տերերը պահանջում են հավասար իրավունքներ և հայտարարում են մենաշնորհների ձևավորման մասին։
Ոլորտի ներկայացուցիչները հինգշաբթի բողոքի ակցիա են կազմակերպել կառավարութայն շենքի դիմաց` պահանջելով պաշտպանել սեփական իրավունքները։
Ինչպես լրագրողներին տեղեկացրեց Շարժական սրճարանների միության հիմնադիր Արեն Մելիքյանը, այն բանից հետո, երբ Երևանի քաղաքապետարանն ապրիլի 19–ին անջատել է նրանց էլեկտրաէներգիան, նրանք պահանջում են օրենսդրական կարգավորումներ, որոնք թույլ կտան իրենց նորմալ գործունեություն ծավալել, ինչից հետո պատրաստ կլինեն աշխատել օրենքի շրջանակում։
«Այս պահին դադարեցված է 47 շարժական սրճարանների գործունեությունը, որոնցից 9–ը մենք արդեն տեղափոխել ենք Երևանի կենտրոնից և կարող ենք ինքնուրույն ազատել տարածքը, սակայն խնդրում ենք, որպեսզի քաղաքապետարանը ևս մեզ ընդառաջ գնա, այդ թվում` հնարավորություն ընձեռի բիզնեսին աշխատել մինչև դաշտը վերջնական չկարգավորվի», – ասաց Մելիքյանը։
Նրա խոսքով, այս պահին քաղաքապետարանը դիմել է անօրինական քայլերի` զրկելով սրճարաններն էլեկտրաէներգիայից (չնայած ՀԷՑ–ի հետ ունեցած ուղիղ համաձայնագրերին), ինչն ուղղված է շարժական սրճարանների աշխատանքի խոչընդոտմանը։
Նա նաև նշեց, որ այս պահին կան օբյեկտներ, որոնք աշխատում են և ունեն արտոնագրեր` նախորդ կառավարության համաձայն, հետևաբար այստեղ կա կանխակալ վերաբերմունք և անհավասար մոտեցում կառավարության կողմից։
«Պահանջում ենք կառավարությանից տրամադրել այլընտրանքային լուծում, որպեսզի կարողանանք շարունակել աշխատանքը։ Պահանջում ենք նաև, որպեսզի կառավարությունը կարգավորի ոլորտի` մեր մասնակցությամբ», – ասաց Մելիքյանը։
Նա ընդգծեց, որ պատրաստ են վճարել արտոնագրի համար նախատեսված պետական տուրքը, իսկ այս պահին վճարում են բոլոր հարկային պարտավորությունները, այդ թվում` որպես ձեռներեցներ, ինչպես նաև եկամտահարկն ու շատ այլ վճարներ։
«Լուրեր են շրջանառվում, որ շուկայում ձևավորվում է մենաշնորհ, քանի որ այնպիսի տպավորություն է, որ այդ քայլով ուզում են մաքրել դաշտը։ Արդեն կան գործարանային մեքենաներ, և դրանք արդեն տեղադրված են, ամեն ինչ կապված է խոշոր դերակատարների` հայկական շուկա դուրս գալու մտադրության հետ։ Ես դեռ չեմ ուզում անուններ նշել, սակայն խոսքը միլիոնատիրոջ և պաշտոնյայի մասին է, ով ցանկանում է դուրս գալ շուկայի այս հատված», – ասաց Մելիքյանը։
Նա ընդգծեց, որ կողմ է պետական կարգավորման ներդրմանը` աշխատանքի հիմնական սկզբունքները հասկանալու համար։ «Երևանի Ավագանին պատրաստ է ցուցաբերել դրական մոտեցում, սակայն քաղաքապետարանի մյուս ստորաբաժանումները չեն դրսևորում նման ձգտում», – նշեց նա։
Նա նաև ասաց, որ շարժական սրճարանների տեղադրման պրակտիկան գոյություն ունի բոլոր քաղաքակիրթ երկրներում, ընդ որում դրանք ունեն համապատասխան կարգավորումներ։
Նրա խոսքով, անհրաժեշտ է որոշել Երևանի կենտրոնում նմանատիպ սրճարանների թույլատրելի քանակը, հեռավորությունը մեկ օբյեկտից դեպի մյուսը։
«Մենք միջազգային փորձի հիման վրա ներկայացրել ենք համապատասխան առաջարկներ, սակայն դեռ որևէ արձագանք չկա։ Արդեն ներդրել ենք 20–150 հազար դոլար բիզնեսի մեջ և ուզում ենք պաշտպանել մեր իրավունքները», – ասաց Մելիքյանը` հիշեցնելով, որ վարչապետը կոչ է արել քաղաքացիներին սկսել սեփական բիզնեսը, սակայն գործնականում ստեղծվում են խոչընդոտներ։–0–