Խախտումներ «Հյուսիս–Հարավ» միջանցքում. տեղամասերից մեկի բետոնածածկը կապամոնտաժվի

ԵՐԵՎԱՆ, 25 հուլիսի. /Նովոստի–Արմենիա/. Հյուսիս-Հարավ կառուցվող ավտոմիջանցքի 1200 մետր տեղամասի փռված բետոնը կապամոնտաժվի, հայտնում է ՀՀ տրանսպորտի, կապի և տեղեկատվական տեխնոլոգիաների նախարարության լրատվական ծառայությունը։

ՀՀ տրանսպորտի, կապի և տեղեկատվական տեխնոլոգիաների նախարար Աշոտ Հակոբյանը չորեքշաբթի այցելել է ավտոճանապարհի Թալին-Լանջիկ, Լանջիկ Գյումրի (տրանշ-3) ճանապարհահատվածներ, որտեղ աշխատանքներ է իրականացնում չինական «Սինոհիդրո Քորփորեյշն» ընկերությունը։

«Այս ճանապարհահատվածում որակի ու ժամկետների հետ կապված մի շարք խնդիրներ էին առաջացել, որոնց լուծման ուղղությամբ վերջին շրջանում կոնկրետ քայլեր են արվել. համալրվել է մասնագետների քանակը, ավելացվել է շինտեխնիկան»,– ասվում է հաղորդման մեջ։


Որակի հսկողություն իրականացնող «Սպեա Ինջեներիա Եվրոպեա և ԱյԱրԴի Ինջինիերինգ կոնսորցիում» ընկերության պատասխանատուները, մանրամասնելով իրավիճակը, նշեցին, որ որակի թեստավորման արդյունքներով փորձնական բետոնապատումը չի համապատասխանում առաջադրված ստանդարտներին և ենթակա է քանդման։

Չինական կողմը ևս ընդունում է, որ անորակ աշխատանք է կատարվել։ Ճիշտ է, որոշ պատճառաբանություններ է ներկայացնում՝ կապված բնակլիմայական պայմանների և այլնի հետ, բայց համաձայն է տրված եզրահանգմանը։

«Ուստի, առաջիկայում այն կքանդվի և աշխատանքներ կտարվեն նոր, որակով բետոնապատում կատարելու ուղղությամբ»,– ասվում է հաղորդման մեջ։

Նախարար Հակոբյանն ընդգծեց, որ ռազմավարական կարևորագույն նշանակություն ունեցող այս ճանապարհի շինարարությունը երկրի ղեկավարության ու ժողովրդի ուշադրության կենտրոնում է, և ամեն ինչ պետք է արվի աշխատանքները նախանշված ժամկետներում և որակով իրականացնելու համար։

Շինտեղամասեր այցելությունից հետո «Սիոնհիդրո Քորփորեյշն» ընկերության գրասենյակում նախարարը հանդիպեց շինարարության պատասխանատուներին, լսեց նրանց փաստարկները շինարարության ընթացքում առաջացած խնդիրների, դրանց լուծման ուղղությամբ կատարվող աշխատանքների վերաբերյալ։

Չինական կողմի պատասխանատուները մանրամասնեցին բոլոր այն քայլերը, որոնք ուղղված են շինարարության տեմպերն արագացնելուն և նախանշված չափորոշիչներին համապատասխան որակ ապահովելուն։

Նախարարը հանձնարարեց արագացնել տեմպերը՝ խստագույնս պահպանելով ճանապարհի շինարարության համար նախատեսված նորմատիվային բոլոր պահանջները։

556 կիլոմետր ընդհանուր երկայնության «Հյուսիս–Հարավ» միջանցքը կապահովի ելք դեպի Սև ծոց և եվրոպական երկրներ Հայաստանի (Մեղրի–Կապան–Գորիս–Երևան–Աշտարակ–Գյումրի–Բավրա) և Վրաստանի տարածքով։ -0-