Հայաստանի նախագահը Հանրապետության հրապարակում է

ԵՐԵՎԱՆ, 21 ապրիլի. /Նովոստի–Արմենիա/. Հայաստանի նախագահ Արմեն Սարգսյանը թիկնազորի ուղեկցությամբ ժամանեց Հանրապետության հրապարակ:

Ավելի վաղ «Ելք» ընդդիմադիր խմբակցության առաջնորդ, «Քաղաքացիական պայմանագիր» կուսակցության ղեկավար Նիկոլ Փաշինյանը հրավիրել է Արմեն Սարգսյանին Հանրապետության հրապարակ` նրա կողմից հնչած բանակցություններ սկսելու հրավերին ի պատասխան:

Հավաքվածները վանկարկում են. «Նախագահ, քայլ արա» և «Մերժիր Սերժին»:

Առայժմ պարզ չէ, թե ինչ են խոսում Հայաստանի նախագահը և Նիկոլ Փաշինյանը, քանի որ նախագահի թիկնապահները թույլ չեն տալիս միացնել բարձրախոսները: Արմեն Սարգսյանն ինքն էլ թույլ չի տալիս ձայնագրել:

Ըստ «Ազատություն» ռադիոկայանի թղթակցի հաղորդման, Նիկոլ Փաշինյանի խոսքից լսելի է եղել այն, որ ինքն ասել է, թե դեմ է վենդետաներին:

Ապրիլի 13-ից Նիկոլ Փաշինյանը Երևանի կենտրոնում շուրջօրյա հանրահավաքներ է սկսել Սերժ Սարգսյանի վարչապետության դեմ, որոնք ապրիլի 16-ից վերածվել են քաղաքացիական անհնազանդության համաքաղաքային ակցիաների: Բողոքներն ուղեկցվում են իրավապահների հետ բախումներով, մասնավորապես, Բաղրամյան պողոտայում, փողոցների և առանցքային խաչմերուկների, ինչպես նաև պետհաստատությունների արգելափակումներով: Ապրիլի 17-ի հանրահավաքում Փաշինյանը հայտարարեց երկրում թավշյա հեղափոխության մեկնարկի մասին: Ակցիաների ընթացքում բերման են ենթարկվում ցուցարարներ: -0-