Facebook–ի էջերի ցանկ է ներկայացվել. ըստ ադրբեջանցի հաքերների, դրանք կոտրված են

ԵՐԵՎԱՆ, 31 հունվարի. /Նովոստի–Արմենիա/. Տեղեկատվական անվտանգության փորձագետ Սամվել Մարտիրոսյանը Facebook–ի էջերի ցանկ է ներկայացրել, որոնք իբր կոտրվել են ադրբեջանցի հաքերների կողմից։

Նա նշել է, որ ադրբեջանցի հաքերներն ավելի վաղ հայտարարել են, որ կոտրել են 3 հազար հայկական Facebook–յան էջ։

Հաքերներն արդեն երկրորդ անգամ են հրապարակում կոտրված էջերի ցանկը, որտեղ ներառվել է 750 էջ։ Մի քանի օր առաջ հրապարակվել էր 370 էջից բաղկացած ցանկ։

«Պրոֆիլներից մի մասի վերաբերյալ լուրջ կասկածներ ունեմ, որ հորինած են, քանի որ չեմ գտնում, լոգինն ու գաղտնաբառը համընկնում են, ինչն այսօր համակարգը պարզապես թույլ չի տա», – նշել է Մարտիրոսյանը։

Ադրբեջանցի հաքերները հայկական Facebook-յան էջեր են կոտրել. հրապարակվել է կոտրված էջերի ցանկը>>

Նա կոչ է արել օգտատերերին ստուգել կոտրված էջերի ցանկում սեփական էջի առկայությունը։

Ավելի վաղ Մարտիրոսյանը նշել էր, որ Հայաստանի կիբերանվտանգությանը սպառնացող հիմնական արտաքին գործոններից է Ադրբեջանը։ Նրա խոսքով, այստեղ կան կարևոր փոփոխություններ, որոնք նկատվում են 2016 թ.–ից։ Եթե մինչև վերջերս ադրբեջանցի հաքերների թիրախը հիմնականում հայկական կայքերն էին, ապա հիմա նրանք մեծ ջանքեր են գործադրում առանձին օգտատերերի վրա հարձակում կատարելու ուղղությամբ։

Ցանկացած տեսակի կիբերգրոհներից պաշտպանվելու համար փորձագետը խորհուրդ է տալիս օգտագործել բարդ գաղտնաբառեր, որոնք չպետք է լինեն օգտատիրոջ անունի կամ հեռախոսահամարի կրկնությունը։ Յուրաքանչյուր էջի համար հարկավոր է ունենալ նոր գաղտնաբառ։ Երկրորդ կարևոր պայմաններից է չսեղմել ցանկացած անհայտ հղման վրա, քանի որ Facebook–ից ստացված հղումը կարող է կեղծ լինել, և եթե դուք սեղմեք այն, հաքերները կարող են հեշտությամբ գողանալ ձեր անձնական տվյալները։–0–