Երեքշաբթի` մայիսի 7–ի առավել ուշագրավ նորությունները (ՎԻԴԵՈ)

ԵՐԵՎԱՆ, 8 մայիսի./Նովոստի–Արմենիա/. «Նովոստի–Արմենիա» գործակալությունը ներկայացնում է երեքշաբթի` մայիսի 7–ի առավել ուշագրավ նորությունների սեփական տարբերակը։

• Նախօրեին Երևանի Ռուբինյանց փողոցում մարդատար «ԳԱԶելը» դուրս է եկել ճանապարհի երթևեկելի հատվածից, բախվել արտաքին լուսավորության սյանը և բռնկվել։ Ավտոմեքենան ամբողջությամբ այրվել է։ Ուղևորները հասցրել են դուրս գալ Գազելից։ ՃՏՊ–ի հետևանքով տուժել է 16–ամյա քաղաքացի, ով տեղում ստացել է համապատասխան բուժօգնություն: Նշվում է, որ ԳԱԶԵԼ–ը սպասարկում էր թիվ 66 երթուղին։

• Նախօրեին Առողջապահության նախարար Արսեն Թորոսյանը հայտնել էր, որ Աշտարակում ֆուտբոլային խաղի ժամանակ 12-ամյա տղան դուրս է եկել դաշտից մոտակա տարածքից գնդակը հետ բերելու համար ։ Այդ պահին ընկել է երկաթբետոնե կոնստրուկցիայի վրա և ստացել ծանր թափանցող գանգուղեղային տրավմա։ Երեխան գտնվում է «Սուրբ Աստվածամայր» ԲԿ-ում։ Ավելի ուշ հայտնի դարձավ, որ երեխայի վիրահատությունը բարեհաջող է ավարտվել։

• Արցախի նախագահ Բակո Սահակյանը և երկրորդ նախագահ Արկադի Ղուկասյանը դիմել են Հայաստանի գլխավոր դատախազ Արթուր Դավթյանին մայիսի 9-ին ընդառաջ Հայաստանի երկրորդ նախագահ Ռոբերտ Քոչարյանի խափանման միջոցը փոխելու խնդրանքով: Գլխավոր դատախազին ուղղված նամակում Արցախի նախագահները պատրաստակամություն են հայտնել հանդես գալ ցանկացած հրապարակային երաշխիքով, «որն անհրաժեշտ կլինի Քոչարյանի՝ մեկուսարանից ազատ արձակվելու և կայանալիք դատավարության ողջ ընթացքում ազատության մեջ լինելու համար»։

• Վարչապետ Նիկոլ Փաշինյանը նախօրեին այցելել է Հայաստանի հանրային ռադիո և շնորհավորել աշխատակիցներին ու ղեկավարությանը Ռադիոյի օրվա կապակցությամբ։ Հիշեցնենք, որ 2018թ.–ի ապրիլի 14–ին Փաշինյանն ու նրա կողմնակիցները ներխուժել են Հանրային ռադիոյի շենք` ուղիղ եթեր դուրս գալու համար։ Սակայն թույլտվություն չէին ստացել, իսկ ուղիղ եթերն անջատվել էր։ «Անցած տարի ես ներխուժեցի, ինչի համար մի քանի անգամ ներողություն եմ խնդրել։ Ուզում կրկին դա անել», – ասել է Փաշինյանը լուրերի արտակարգ թողարկման ժամանակ։ Նրա խոսքով, իր այցը կրում է սիմվոլիկ բնույթ, դա վերադարձ էր Հանրային ռադիո։ «Հաջողվեց անել այն, ինչ չէր ստացվել նախորդ տարի` ելույթ ունենալ ուղիղ եթերում», – ասել է վարչապետը։

• Հայաստանի ազգային վիճակագրական կոմիտեն հրապարակել է ավելի հաճախ տրվող անունների ցանկը, որոնցով անվանակոչվել են երեխաները 2018թ.–ին։ Ցանկը գլխավորել են Նարեն ու Դավիթը։ 2018թ.–ին Նարե անունով անվանակոչվել է 658 նորածին, Դավիթ անունով` 1404։ Աղջիկների տարածված անունների հնգյակում են Մարիան (599), Մանեն (498), Մարին (487) և Արփին (426)։ Տղաների անունների հնգյակում են Նարեկը (1084), Հայկը (536), Տիգրանը (525), Մարկը (522)։ Աղջիկների ամենատարածված ազգանունների ցանկը գլխավորել է Գրիգորյանը (522), տղաներինը` Հովհաննիսյանը (563)։ Նորածին աղջիկների ամենատարածված ազգանունների թվում են Հովհաննիսյանը (476), Հարությունյանը (476), Սարգսյանը (473), Խաչատրյանը (436), տղաներինը` Գրիգորյանը (533), Հարությունյանը (529), Սարգսյանը (525), Խաչատրյանը (514)։–0–