ԵՐԵՎԱՆ, 8 փետրվարի. /Նովոստի–Արմենիա/. Հայաստանում պտղի սեռով պայմանավորված հղիության արհեստական ընդհատումների կանխման ծրագրի իրագործման արդյունքներն են քննարկվել ուրբաթ հանրապետության Առողջապահության նախարարությանն առընթեր Հանրային խորհրդի նիստում, որը վարել է գերատեսչության ղեկավար Արսեն Թորոսյանը։
Ինչպես նիստում հայտնեց ԱՆ մայրության և վերարտադրողական առողջության բաժնի պետ Գայանե Ավագյանը, համալիր միջոցառումների շնորհիվ այս ուղղությամբ որոշակի դրական դինամիկա է արձանագրվել։
Նախարարության տվյալներով, եթե ծրագրի գործարկումից առաջ` 2008-2012 թվականներին նորածին աղջիկների/տղաների միջին հարաբերակցությունը կազմում էր 100/115, ապա արդեն 2014 թվականին այդ հարաբերակցությունը կազմել է 100/113.4, 2015 թվականին` 100/112.7, իսկ 2016 թվականին` 100/111.9, իսկ 2017 թվականին 100/109.8, իսկ 2018 թվականին, նախնական տվյալներով, 100/108.5։
Загружается новость ...
"Право"
Ավագյանն ընդգծեց, որ տարբեր միջազգային կազմակերպություններ, այդ թվում, նույն խնդիրն ունեցող երկրները, բարձր են գնահատում Հայաստանի փորձը և ցանկություն են հայտնել այն իրենց մոտ կիրառելու վերաբերյալ։
Մի քանի տարի առաջ ՄԱԿ–ի անցկացրած ուսումնասիրությունը ցույց է տվել, որ Հայաստանում պահպանվում է սեռով պայմանավորված արհեստական վիժումների խնդրի արդիականությունը, հատկապես մարզերում։ Սակայն իրավիճակն աստիճանաբար փոխվում է։
Այսպես, «Մարդկային զարգացման միջազգային կենտրոնի» տվյալներով, եթե 2011 թվականին կանանց 60 տոկոսը նշում էր, որ իրենց շրջապատում նախընտրությունը տրվում է արական սեռի երեխայի ծննդյանը, ապա 2017 թվականին այդ կարծիքին էր կանանց միայն 37 տոկոսը։ -0-