Արթիկի դպրոցի նախկին տնօրենը կասկածվում է ավելի քան 3,5 մլն դրամի յուրացման համար (ՎԻԴԵՈ)

ԵՐԵՎԱՆ, 29 մարտի. /Նովոստի–Արմենիա/. Ոստիկանությունը մանրամասներ է ներկայացրել Արթիկի հիմնական դպրոցներից մեկի նախկին տնօրենի կողմից կատարած չարաշահումների վերաբերյալ։

Ինչպես հայտնում է գերատեսչության մամուլի ծառայությունը, օրեր առաջ ոստիկանության ԿՀԴՊ գլխավոր վարչության կոռուպցիայի և տնտեսական գործունեության դեմ ուղղված հանցագործությունների հակազդման վարչությունում գործի վերաբերյալ օպերատիվ տեղեկություններ էին ստացվել։

Համագործակցելով ոստիկանության Շիրակի մարզային վարչության և Արթիկի բաժնի ծառայողների հետ, ձեռնարկված համատեղ օպերատիվ-հետախուզական միջոցառման արդյունքում պարզվել է, որ Արթիկի թիվ 2 հիմնական դպրոցի նախկին տնօրենը, օգտագործելով իր պաշտոնեական դիրքը, 1996 թվականի հոկտեմբերից 2014 թվականի օգօստոսն ընկած ժամանակահատվածում որպես էլեկտրիկ-փականագործ է հրամանագրել եղբորը։


Էլեկտրիկ-փականագործը փաստացի աշխատանքի չի հաճախել և պարբերաբար բացակայել է հանրապետությունից։ Նախկին տնօրենը պաշտոնեական փաստաթղթերում կեղծ տեղեկություններ մուտքագրելով՝ յուրացրել է եղբոր անվամբ հաշվարկված և դուրս գրված աշխատավարձը՝ ընդհանուր 3,5 միլիոնից ավելի դրամը։

Առերևույթ դեպքի առթիվ ՀՀ քրեական օրենսգրքի համապատասխան հոդվածների հատկանիշներով հարուցվել է քրեական գործ։

Կատարվում է նախաքննություն։ -0-