ԵՐԵՎԱՆ, 13 օգոստոսի. /Նովոստի-Արմենիա/. Մոտ երկու ամիս առաջ Արարատյան դաշտավայրի արագիլների հետ սկսեց տարօրինակ բան կատարվել` թռչունների փետուրները կեղտոտվեցին ճարպ հիշեցնող անհայտ նյութով: Դրա պատճառով թռչունները չեն կարողանում թռչել և սնունդ հայթայթել և հայտնվում են մահվան շեմին: Բնապահպանները միանգամից ահազանգեցին` պահանջելով անհապաղ քայլեր ձեռնարկել:
Որտե՞ղ են կեղտոտվում արագիլները
Հայկական բնապահպանական ճակատն իր Facebook-ում նախօրեին սևացած թևերով արագիլի մասին տեսանյութ է հրապարակել` թռչունը չի կարողանում օդ բարձրանալ և ընկնում է ծանրացած փետուրների քաշի պատճառով:
Ենթադրվում է, որ արագիլները կեղտոտվում են Հրազդան գետում սնվելիս, հավանաբար, ջրում հայտնված ճարպանման նյութով: Ինչպես հայտնեց Կենդանաբանության ինստիտուտի ողնաշարավորների լաբորատորիայի վարիչ Մամիկոն Ղասաբյանը, հարյուրավոր կեղտոտված արագիլներ շարունակում են մնալ անհասկանալի վիճակում` առանց հատուկ լուծույթներով մաքրման այդ նյութն ինքը դուրս չի գա, նրանք չեն կարողանա թռչել ու կերակուր գտնել: Բայց ամենակարևորը` աշնանը նրանք չեն կարողանա չվել Աֆրիկա, իսկ մնալով Հայաստանում` չեն կարողանա փրկվել ցրտից:
«Նրանք կկարողանա՞ն չվել Աֆրիկա… Սա իսկական աղետ է: Չեմ կարող ասել, թե նրանցից քանիսը կդիմանա ճանապարհին, ինչ կլինի նրանց հետ: Նրանց ճակատագիրը մշուշոտ է», - Ղասաբյանի խոսքն է մեջբերում «Ազատություն» ռադիոկայանը:
Որտեղի՞ց է հայտնվել այդ նյութը
Թեև խնդիրն այսօր չի առաջացել, մինչ օրս հայտնի չէ, թե դա ինչ նյութ է:Կարծիք կա, որ մեղավոր են տնտեսվարող սուբյեկտները, որոնք գետն են լցնում իրենց գործունեության թափոնները:
«Ներեցեք այդ դաժան պահը հրապարակելու համար, բայց տնտեսվարող սուբյեկտները, որոնք արագիլներին այս օրին են հասցրել, պետք է բացահայտվեն և պատժվեն: Նրանց մեղքով աղտոտված են գետերն ու դրենաժային ջրմուղները, որտեղ սնվելու ժամանակ ճարպանման նյութով կեղտոտվել են հարյուրավոր արագիլներ: Նրանք չեն կարողանում թռչել, ինքնուրույն սնվել և կերակրել իրենց ձագերին, նրանց փաստացի մահ է սպասվում», - Facebook-ի իր էջում գրել է Հայ բնապահպանական ճակատը:
Ինչպես նշում են կազմակերպությունում, կամավորներն անում են հնարավորինը, բայց դա բավարար չէ, և ոչ ոք չգիտի` քանի արագիլ է մահացել վերջին ամսում:
Ինչպե՞ս պայքարել դրա դեմ
Հայաստանի շրջակա միջավայրի նախարարությունը հավաստիացնում է, որ խնդիրը գերատեսչության անմիջական հսկողության ներքո է, իսկ արագիլների փետուրների մաքրման աշխատանքը պարբերաբար կանցկացվի:
Ինչպես հայտնում է նախարարության մամուլի ծառայությունը, այսօրվա դրությամբ աշխատանքներ են տարվում «TSE. Դեպի կայուն էկոհամակարգեր» հասարակական կազմակերպության կողմից:
Գերատեսչությունից նշեցին, որ Շրջակա միջավայրի նախարարության իրավախորհրդատու Կարեն Աղաբաբյանը մի խումբ կամավորների հետ տեղում համապատասխան հետազոտություններ և մաքրման աշխատանքներ են կատարել:--0--
