Ախորժակս գրգռեցիք, պատրաստ եղեք, որ մի օր կարող եմ մտնել մի ՔԿՀ և սնունդը փորձել. Փաշինյանը` Զեյնալյանին (ՎԻԴԵՈ)
16:34
18 Ապրիլի 2019
ԵՐԵՎԱՆ, 18 ապրիլի./Նովոստի–Արմենիա/. Այսօր կայացած կառավարության նիստի ընթացքում ՀՀ վարչապետ Նիկոլ Փաշինյանն արդարադատության նախարար Արտակ Զեյնալյանից հետաքրքրվեց ՔԿՀ–ներում մատուցվող սննդի որակից։
«Որևէ փոփոխություն ունե՞նք ՔԿՀ–ներում սննդի որակի հետ կապված – հետաքրքրվեց վարչապետը Զեյնալյանից։
«Այո, սննդի որակն էական փոփոխություն է կրել, դա նաև դրսևորվում է հանձնուքների քանակի շոշափելի նվազմամբ, մենք դատապարտյալներից և իրավապաշտպաններից ևս արձագանքներ ենք ստանում, որ սննդի որակը էականորեն բարելավվել է», – նշեց Զեյնալյանը։
Загружается новость ... "Лево"
Փաշինյանն իր հերթին հետաքրքրվեց, թե մասնավորապես ո՞վ է հետևում, որ ՔԿՀ–ներում գտնվող բոլոր անձանց կառավարության որոշմամբ սահմանված սննդի չափաբաժինները պատշաճ որակով տրամադրվեն։
«Դուք հիմա երաշխավորու՞մ եք, որ այնտեղ նորմալ, ուտելի սնունդ է տրվում կալանավորված անձանց», – հարցրեց ՀՀ վարչապետը։
«Ես բազմիցս ինքս համտեսել եմ այդ սնունդը, ստուգումներ իրականացվում են, դիտորդական խմբեր կան, մշտապես կապ կա պատգամավորների հետ։ Այս պահի դրությամբ դրա վերաբերյալ որևէ դիտողություն չունենք։ Միաժամանակ մենք մտածում ենք առհասարակ վերապատվիրակել սննդի նախապատրաստումը, կատարում ենք հաշվարկներ` որքան է նստում մեկ հոգու ապահովելը սնունդով, նաև դրա մեջ ներառած անձնակազմի վարձատրությունն ու աշխատավարձը», – նշեց արդարադատության նախարարն` ավելացնելով, որ իրականացրել են պիլոտային ծրագիր Գորիսում, և այն շատ դրական արձագանքներ է տվել։
Զեյնալյանը նաև պարզաբանեց, որ այլ ընկերություն է պատրաստում սնունդն ու պատրաստի մատուցում։
«Մենք կբացառենք նաև կոռուպցիոն ռիսկը, եթե դրսից պատրաստի սնունդը մատուցվի։ Տարվում են այդ ուղղությամբ աշխատանքներ», – ասաց Զեյնալյանը։
«Շատ լավ, ամեն դեպքում պատրաստ եղեք, որ ես կարող է մի օր մտնեմ մի քրեակատարողական հիմնարկ և սնունդը փորձեմ, որովհետև ախորժակս գրգռեցիք, այնքան պատկերավոր նկարագրեցիք ՔԿՀ–ների սնունդը», – ժպտալով նշեց ՀՀ վարչապետը։–0–