ԵՐԵՎԱՆ, 10 մայիսի./Նովոստի–Արմենիա/. Քաղաքային իշխանությունը հանձնառու է թարմացնել վերելակների ֆոնդը, և վերելակները թարմացվելու են։ Այս մասին Facebook–յան իր էջում նշել է Երևանի քաղաքապետարանի մամուլի քարտուղար Հակոբ Կարապետյանը։
Նա նաև մեկնաբանել է մի քանի լրատվամիջոցների հրապարակումները, որտեղ ասվում է, որ վերելակների թարմացման համար վճարելու են բնակիչները՝ փորձելով դա ներկայացնել որպես «անակնկալ»:
«Կարծում եմ, ոչ մեկի համար գաղտնիք չէ, որ երկրի հանրային ոլորտում ցանկացած աշխատանք՝ սկսած միջպետական ճանապարհներ կառուցելուց, բանակի համար սպառազինություններ ձեռք բերելուց, մինչև մայթերի եզրաքարերի վերանորոգելն ու ցանկապատերը ներկելը, արվում է բնակիչների ֆինանսավորմամբ՝ նրանց վճարած հարկերի և տուրքերի միջոցով», – նշել է Հակոբյանը:
Նրա խոսքով, վերելակների թարմացումը տեղի է ունենալու բնակիչների անմիջական մասնակցությամբ:
«Քաղաքը մշակելու է այն մեխանիզմը և գտնելու է այն միջոցները, (վարկային, դրամաշնորհային և/կամ այլ), որոնց շնորհիվ վերելակների թարմացման գործընթացը քաղաքացիների համար առավելագույնս մատչելի և ընդունելի կլինի է», – գրել է Հակոբյանն` ավելացնելով, որ սա է հանրային կառավարումը և այստեղ նոր բան պետք չէ փնտրել:
«Ի դեպ, հիմա էլ են քաղաքացիները վճարում վերելակների սպասարկման համար, բայց վճարում են հին ու ոչ միշտ անվտանգ վերելակների համար, իսկ քաղաքապետարանի ներկայացրած մեխանիզմով վճարելու են միանգամայն նոր ու անվտանգ վերելակների համար», – նշել է Երևանի քաղաքապետարանի մամուլի քարտուղարը։
Նրա խոսքով, քաղաքապետարանը արդեն ավարտին է հասցնում վերելակների ամբողջական թարմացման ծրագիրը, այն հանրության դատին կներկայացվի մոտ օրերս:
«Վերելակների՝ տասնամյակներով ձգված հարցի լուծմանը քիչ է մնացել», –եզրափակել է Հակոբյանը։
Հիշեցնենք, որ նախօրեին արտակարգ պատահար էր տեղի ունեցել Երևանի Աջափնյակ համայնքի բազմաբնակարան շենքերից մեկում. վերելակի չորս թոկերից մեկը պոկվել էր, ինչի հետևանքով վերելակը 2-րդ հարկի մակարդակից հայտնվել է 1-ին հարկի մակարդակում։ Միջադեպի հետևանքով, բարեբախտարա, տուժածներ չկան։–0–
