Փաշինյան. «Իքս պահին մի աղետ ունենալու ենք, մեր կարուսելներին նայում ես, 70 տոկոսն աղետի նախանշան է»

ԵՐԵՎԱՆ, 18 օգոստոսի./Նովոստի-Արմենիա/. Պետք է հստակ գնալ երկրում հստակ ստանդարտներ ունենալու ճանապարհով, քանի որ անորակ իրականության հետ կոմպրոմիսն անխուսափելիորոն բերելու է աղետի։ Այս մասին այսօր՝ օգոստոսի 18-ին, Կառավարության հերթական նիստին ասաց վարչապետ Նիկոլ Փաշինյանը։

«Եկեք չգնանք կոմպրոմիսների. ես չեմ ասում՝ անտրամաբանական «գերանդին» առնենք, աջուձախ փակենք, արգելենք ամեն ինչ, բայց պետք է հստակ պահպանենք անվտանգության կանոնները։ Պետք է գնանք նոր ստանդարտների։ Հիմա ամեն տարի գարնանը ես հրավիրում եմ, ասում եմ՝ սեզոնը բացվել է, մեր երկրում էսքան կարուսել է աշխատում։ ԱԻՆ-ի ՊՈԱԿ-ն, այո, պետք է գնա, բայց ինձ համար ակնհայտ է, որ ինչքան էլ թղթաբանությամբ, տեղեկանքներով ամեն ինչ նորմալ է, առաջիկա ժամանակում՝ իքս պահի, մի աղետ ունենալու ենք, որովհետև եթե մենակ վիզուալ մեր կարուսելներին նայում ես, 70 տոկոսն աղետի կոնկրետ նախանշան է։ Քանի՞ հոգի ոնց կտուժի, զոհ կլինի՞, թե՞ չի լինի, քանի՞ հոգի կլինի, հետո կասենք՝ էսքան տարի չէի՞նք տեսնում, որ էդ ամեն ինչը տեղի է ունենում»,- ասաց Նիկոլ Փաշինյանը։-0-