Մոտ երկու րոպե ինքնաթիռը որոշ սարքավորումներով չի նկատվել. Սանոսյանը` Երևան–Կապան թռիչքի մասին (ՎԻԴԵՈ)

ԵՐԵՎԱՆ, 27 ապրիլի./Նովոստի–Արմենիա/. Կառավարության նպատակն է կանոնավոր փոխադրումներ ունենալ Երևանից դեպի Կապան։ Այս մասին այսօր կառավարության նիստի ժամանակ հայտարարեց տարածքային կառավարման և ենթակառուցվածքների նախարար Գնել Սանոսյանն` անդրադառնալով նախօրեին տեղի ունեցած Երևան–Կապան փորձնական թռիչքին։

Նախօրեին պատմական թռիչք է տեղի ունեցել Երևանի «Զվարթնոց» օդանավակայանից դեպի Կապանի «Սյունիք» օդանավակայան։ Երևանի ժամանակով 10:58 բարեհաջող վայրէջք է կատարել չեխական արտադրության մարդատար օդանավը, որը նախատեսված է 19 ուղևորի համար: Օդանավը «Զվարթնոց» միջազգային օդանավակայանից օդ է բարձրացել ժամը 10:10: Այս թռիչքը իսկապես պատմական էր, քանի որ 90-ականներից Կապանի օդանավակայանում թռիչքներ չեն իրականացվել՝ բացառությամբ 2017 թվականին մեկ մասնավոր թռիչքի:

«Մի հատված ենք ունեցել, որտեղ մոտ երկու րոպե ինքնաթիռը որոշ սարքավորումներով չի նկատվել, որը տեխնիկական է։ Մենք հենց դա էլ ուզում էինք հասկանալ, որպեսզի հետագայում թռիչքուղու ուղղությամբ մեր ալեհավաք և այլ սարքավորումները շտկենք։ Ընդհանուր առմամբ, թռիչքը դրական ենք գնահատում։ Մեր նպատակն է վերլուծել տեղի ունեցածը»,– ասաց նախարարը։

Սանոսյանը նշեց, որ թռիչքը տևել է 46 րոպե, բայց կանոնավոր թռիչքների դեպքում տևողությունը 5–6 րոպե կնվազի։

Նա ասաց , որ վերլուծություններից ու սարքավորումների փոփոխությունից հետո հնարավոր է նոր տեխնիկական փորձնական թռիչք իրականացվի։

«Քանի որ սա ներքին թռիչք է, պետք է հասկանանք, թե «Զվարթնոցում» ու տեղում ինչպես պետք է կազմակերպենք, որովհետև անձնագրային որոշակի գործառույթները պետք է հասկանալ։ Կապանի օդանավակայանը մեծ հաշվով պատրաստ է թռիչքներն ընդունելու։ Եվ մեր նպատակն է այս ամենն ավարտելուց հետո գնալ նրան, որ ունենանք կանոնավոր փոխադրումներ»,– ասաց Սանոսյանը։–0–