«Հանրապետական» ծննդատան տնօրեն Ռազմիկ Աբրահամյանը կմնա ազատության մեջ

ԵՐԵՎԱՆ, 22 դեկտեմբերի./Նովոստի–Արմենիա/. «Վերարտադրողական առողջության պերինատոլոգիայի, մանկաբարձության և գինեկոլոգիայի հանրապետական ինստիտուտի» («Հանրապետական» ծննդատուն) տնօրեն Ռազմիկ Աբրահամյանը, ով մեղադրվում է երեխաների ապօրինի որդեգրման գործով, կմնա ազատության մեջ։ Դատարանը մերժեց Աբրահամյանին կալանավորելու միջնորդությունը, գրում են հայկական ԶԼՄ–ները։ 

Նշենք, որ ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:  

Ռազմիկ Աբրահամյանը ձերբակալվել էր դեկտեմբերի 18–ին՝ օտարերկրյա որդեգրումների գործընթացում առկա չարաշահումների դեպքերի առթիվ քննվող քրեական գործի շրջանակում։ Նույն գործի շրջանակում ձերբակալվել էին նաև Աբրահամյանի տեղակալ Արշակ Ջերջերյանը, «Երևանի մանկան տուն» ՊՈԱԿ-ի տնօրեն Լիանա Կարապետյանը և ևս մեկ քաղաքացի: 

«Նովոստի–Արմենիա» գործակալությանը չհաջողվեց կապ հասատել Ռազմիկ Աբրահամյանի կամ նրա ներկայացուցիչների հետ` գործի վերաբերյալ մեկնաբանություն ստանալու համար։–0–