ԵՐԵՎԱՆ, 22 հուլիսի./Նովոստի–Արմենիա/. Երևանի քաղաքապետարանի մամուլի քարտուղար Հակոբ Կարապետյանը մեկնաբանել է հասարակական տրանսպորտի հնարավոր թանկացման մասին սոցցանցերում շրջանառվող տեղեկությունները։
«Անցած հանգստյան օրերին որոշ լրատվամիջոցներ եւ սոցցաների օգտագերեր վերարտադրում էին ֆեյսբուքյան կեղծ էջից տարածված մի հարցում՝ նպատակ ունենալով տպավորություն ստեղծել, թե իբր քաղաքային իշխանությունը պատրաստվում է բարձրացնել հանրային տրանսպորտի սակագինը», – գրել է Կարապետյանը Facebook–յան իր էջում։
Նրա խոսքով, քաղաքապետարանը հանրային տրանսպորտի սակագնի փոփոխության հարց չի քննարկում։
«Երևանցիներին խնդրում ենք քաղաքապետարանի գործունեությանն առնչվող հարցերում հիմնվել պաշտոնական տեղեկատվության վրա», – նշել է Երևանի քաղաքապետարանի մամուլի քարտուղարը։
Օրերս Երևանի ավագանու «Իմ քայլը» խմբակցության անունով բացված Facebook–յան էջում հայտնվել էր հարցում հետևյալ թեմայով` «Պատրա՞ստ են երևանցիները հասարակական տրանսպորտի սակագնի բարձրացմանը տրանսպորտային ցանցի բարելավման դեպքում»։ Հարցման մեջ նախատեսվում էր տրանսպորտի սակագնի բարձրացում` ներկայիս 100 դրամից մինչև 150 կամ 200 դրամ։ Հարցումն առաջացրել էր հայ օգտատերերի վրդովմունքը, որոնց խոսքով, թանկացումը ժամանակավրեպ է և չհիմնավորված, քանի որ տրանսպորտի աշխատանքում որևէ փոփոխություն տեղի չի ունեցել։–0–