Արա Սաղաթելյանը կալանավորվեց, Կարեն Բեքարյանի խափանման միջոցի որոշումը կհրապարակվի այսօր

ԵՐԵՎԱՆ, 22 փետրվարի./Նովոստի–Արմենիա/. Դատարանը բավարարեց ՀՀ ԱԺ աշխատակազմի նախկին ղեկավար Արա Սաղաթելյանին կալանավորելու վերաբերյալ միջնորդությունը և նրա նկատմամբ որպես խափանման միջոց ընտրեց երկամսյա կալանավորումը։

Այս մասին Facebook–յան իր էջում գրել է իրավաբան Ռոբերտ Հայրապետյանը` նշելով, որ «ակներև է, որ դատարանն այս որոշումը կայացրել է քաղաքական ճնշման տակ»։

Ուրբաթ երեկոյան ԱԱԾ–ն բերման էր ենթարկել ու ձերբակալել քաղաքական վերլուծաբան, «Քառյակ մեդիա» մեդիոհոլդինգի համահիմնադիր Կարեն Բեքարյանին, ԱԺ աշխատակազմի նախկին ղեկավար Արա Սաղաթելյանին ու ևս հինգ քաղաքացու։ Բեքարյանին, Սաղաթելյանին և ևս երկու ձերբակալվածի մեղսագրվում է, մասնավորապես, #Gagik_Soghomonyan անունով ֆեյքային էջի կառավարում և չթույլատրված տեղեկատվության հրապարակում։

Սաղաթելյանի փաստաբան Հակոբ Ենոքյանը Facebook–յան իր էջում գրել , որ Արա Սաղաթելյանին առաջադրված մեղադրանքը ինչպես իրավական, այնպես էլ փաստական առումով անհիմն է և որևէ կերպ չփաստարկված։ 

«Եթե շարժվենք ԱԱԾ-ի տրամանաբանությամբ, ապա դատարան ներկայացրած նյութերով «հաստատվում է» ֆեյքի կապը ոչ թե այս գործով չորս մեղադրյալների, այլ ավելի քան երկու տասնյակ անձի հետ», – նշել է Ենոքյանը։

Կարեն Բեքարյանի մասով նրա փաստաբան Գոռ Միքայելյանը նշել է, որ Բեքարյանի խափանման միջոցի որոշման հրապարակումը կլինի երկուշաբթի առավոտյան 11:30:

Ավելի վաղ հաղորդվել էր, որ ձերբակալելուց առաջ ԱԱԾ աշխատակիցները խուզարկել են Սաղաթելյանի և Բեքարյանի աշխատասենյակները։ Փաստաբանների խոսքերով, խուզարկության ընթացքում առգրավվել են հեռախոսներ և համակարգիչներ ՀՀ Սահմանադրության և ՔՕ կոպիտ խախտումներով։ 

Նրանց հետ այդ երեկո ԱԱԾ էին տեղափոխվել ևս հինգ քաղաքացիներ, այդ թվում` Սաղաթելյանի գրասենյակի աշխատակիցները, Պառլամենտարիզմի զարգացման միջազգային կենտրոնի տնօրեն, սահմանադրական իրավունքի փորձագետ Գոհար Մելոյանը, ադրբեջանագետ Անժելա Էլիբեգովան, նրա հեռախոսն ու աշխատանքային համակարգիչը ևս առգրավվել են։ Էլիբեգովային և Մելոյանին հարցաքննել են, այնուհետև ազատ են արձակել։

Բեքարյանին և Սաղաթելյանին նույն երեկո մեղադրանքներ են առաջադրվել երեք հոդվածներով` ազգային, ռասայական թշնամանք տարածելու հրապարակային կոչեր, թշնամանք հարուցելը ինչ-որ շերտերի նկատմամբ և ռազմական դրության ժամանակ տեղեկատվության տարածման կանոնների խախտում։–0–