ԵՐԵՎԱՆ, 21 նոյեմբերի./Նովոստի–Արմենիա/. ՓՄՁ ներկայացուցիչները կկարողանան օգտվել Ամերիաբանկի բիզնես վարկավորման ծառայություններից թվային հարթակի միջոցով, ասուլիսի ժամանակ տեղեկացրեց Ամերիաբանկի մանրածախ գործառնությունների գծով տնօրեն Արման Բարսեղյանը։
«Մենք շարունակում ենք ընդլայնել առցանց ծառայությունների շրջանակը` որպես թվային ոլորտի առաջատար բանկ։ Արդեն հաջորդ շաբաթվանից Ամերիաբանկը ՓՄՁ–ներին հնարավորություն կընձեռի դիմել առցանց մինչև 150 մլն դրամի չափով վարկի տրամադրման համար», – ասաց նա։
Բարսեղյանը պարզաբանեց, որ առցանց կցելով անհրաժեշտ փաստաթղթերն անմիջապես համակարգում ` փոխառուները կկարողանան առցանց հետևել վարկային հայտի ընթացքին: Ընդ որում, օնլայն հարթակում ընկերության տվյալները կարելի է մուտքագրել ընդամենը մեկ անգամ և առցանց դիմել տարբեր վարկերի ստացման համար:
Загружается новость ... "Лево"
Վարկերի երեք խումբ
Նրա խոսքով, սպասարկման որակը, օպերատիվությունը բարձրացնելու և յուրաքանչյուր հաճախորդի նկատմամբ համապատասխան մոտեցում ցուցաբերելու համար` բանկը ներդրել է վարկային հայտերի տարբերակման հնարավորություն։
Առաջին խմբում ներառվել են ՓՄՁ–ի չապահովագրված վարկերը` մինչև 10 մլն դրամի չափով, որոնք պահանջում են օպերատիվ լուծում։ Դրա համար պետք է լինել Ամերիաբանկի հաշվետեր հաճախորդ և գրանցվել ID քարտով։
«1–10 մլն դրամի վարկերը հնարավոր է ստանալ 5 րոպեում և մեծամասամբ առանց բանկ այցելելու։ Հայտն ավտոմատ կերպով չհաստատվելու դեպքում Բանկի մասնագետն այցելում է տվյալ բիզնեսի գործունեության վայր և տեղում` պարզ վերլուծության միջոցով, տալիս նախնական պատասխան: Վերլուծության հիման վրա վարկը կարող է տեղում հաստատվել, լրացուցիչ հաստատման անհրաժեշտության դեպքում որոշումը կայացվում է 1 աշխատանքային օրվա ընթացքում», – պարզաբանեց նա։
Վարկը տրամադրվում է առանց անշարժ գույքի գրավադրման, իսկ վաղաժամկետ մարման դեպքում տուգանք չի գանձվում: Նշված գումարի սահմանում հնարավոր է նաև ավտոմատ ձևով վերաֆինանսավորել այլ բանկերում գործող վարկերը` առանց այդ բանկեր այցելելու։
Երկրորդ խմբին առաջարկվում է 10–20 մլն դրամի վարկ։ Այս դեպքում անհրաժեշտ է ապահովել միայն մասնակի գրավ` 10 մլն ՀՀ դրամից կամ համարժեք արտարժույթից բարձր գումարի համար: Այստեղ ևս բանկն իրականացնում է բավականին լոյալ քաղաքականություն։
«Եթե անշարժ գույքի գրավադրման որոշում է ընդունվում, ապա գրավի գումարը կարող է կազմել գրավադրվող անշարժ գույքի արժեքի մոտ 50%–ը, իսկ ավտոմեքենայի դեպքում տոկոսը կլինի ավելի բարձր», – նշեց Բարսեղյանը։
Նրա խոսքով, այս սահմանաչափի ներքո ևս հնարավոր է Ամերիաբանկ տեղափոխել այլ բանկերի կամ վարկային կազմակերպությունների բիզնես վարկերը` առանց այդ ընկերություններ այցելելու:
Երրորդ խմբում ներառվում են բանկի այն հաճախորդները, ովքեր ներկայացնում են 20 - 150 մլն ՀՀ դրամ կամ արտարժույթով համարժեք վարկեր ստանալու հայտ։ Անհրաժեշտության դեպքում բանկը կարող է կապվել հաճախորդի հետ և ստանալ անհրաժեշտ տեղեկատվություն։
«Բիզնեսի վարկավորման համար Ամերիաբանկի կողմից ստեղծված այս նոր հնարավորությունները կնպաստեն երկրում ՓՄՁ-ների գործունեության ընդլայնմանն ու զարգացմանը», – ընդգծեց Բարսեղյանը։
«Ամերիաբանկ» ՓԲԸ–ն Հայաստանի դինամիկ զարգացող բանկերից է և դասվում է երկրի ամենակայուն և խոշոր ֆինանսական հաստատությունների շարքին: Այն Հայաստանում առաջին ներդրումային բանկն է և սկսած 2007թ-ից տրամադրում է նորարարական բանկային ծառայությունների լայն տեսականի: 2018թ.–ի արդյունքում Ամերիաբանկը Հայաստանի բանկային հատվածի առաջատարն է բոլոր հիմնական ցուցանիշներով (ակտիվներ, պարտավորություններ, վարկային պորտֆել, մաքուր եկամուտ և կապիտալ)։–0–
