ԵՐԵՎԱՆ, 17 մարտի./Նովոստի–Արմենիա/. Մայրաքաղաքի Սարալանջի փողոցում հենապատի փլուզման հետ կապված Երևանի քաղաքապետարանը տեղեկացնում է, որ հենապատի վերակառուցման պատվիրատուն եղել է «Ագրոբիզնես և գյուղի զարգացման կենտրոն» հիմնադրամը, իսկ աշխատանքներն իրականացվել են «Մեվրիկար» շինարարական կազմակերպության կողմից, հայտնում է քաղաքապետարանի մամուլի ծառայությունը։
Չորքեշաբթի, ժամը 04.49-ին ՀՀ ԱԻՆ–ն ահազանգ է ստացել, որ Երևանի Սարալանջի պողոտայում՝ Անտառային փողոցի մոտակայքում, ճանապարհահատվածը փլվել է (մոտ 1 քմ), ինչի հետևանքով երթևեկությունը խափանվել է, անհրաժեշտ է օգնություն:
Պարզվել է¸ որ Ազատության պողոտայի թիվ 1/21 շենքի դիմաց մոտ 15մ երկարությամբ և 8մ բարձրությամբ բետոնե հենապատը փլուզվել է և թափված հողազանգվածի հետ փակել Սարալանջի պողոտայի երթևեկելի հատվածը: Տարածքի տեղազննման արդյունքում Ազատության պողոտայի թիվ 1/21 շենքի դիմաց՝ ասֆալտի վրա¸ նկատվել են մոտ 5մ երկարությամբ և մոտ 0¸7 սմ լայնությամբ ճաքեր: Փրկարարները ժապավենով սահմանազատել են շենքի հարակից վտանգավոր հատվածը:
Երևանի կենտրոնական փողոցներից մեկում բետոնե հենապատ է փլուզվել. խափանվել է երթևեկությունը>>
Քաղաքապետարանի մամուլի ծառայությունը տեղեկացնում է, որ փլուզման հետևանքով ճանապարհի երթևեկելի հատվածում ստեղծված անանցանելի վիճակի վերացման նպատակով Երևանի քաղաքապետարանի համապատասխան ծառայությունները վաղ առավոտից իրականացրել են անհրաժեշտ աշխատանքներ:
Փլուզում Երևանում. վարկածներ և պարզաբանումներ դեռևս չկան>>
Երևանի քաղաքապետարանը պատվիրատուի առջև արդեն իսկ պահանջ է դրել օրենսդրությամբ կառուցապատողին վերապահված պարտականությունների շրջանակում սեղմ ժամկետում ձեռնարկել համապատասխան քայլեր՝ փլուզման հետևանքները վերացնելու և նոր հենապատ կառուցելու ուղղությամբ:-0-