ԵՐԵՎԱՆ, 3 մարտի. /Նովոստի–Արմենիա/. «Նովոստի–Արմենիա» գործակալությունը ներկայացնում է նախորդ շաբաթվա կարևոր նորությունների հնգյակը։
Հայաստանի խորհրդարանի 90 «կողմ» և 10 «դեմ» ձայնով Արմեն Սարգսյանն ընտրվեց Հայաստանի չորրորդ նախագահ։ Պատգամավորներն առաջին անգամ ընտրեցին պետության ղեկավարին, քանի որ երկիրն անցել է խորհրդարանական իշխանավարման։ Քվեարկությանը մասնակցեց 105 պատգամավորներից 101–ը։ Մեկ քվեաթերթիկ ճանաչվեց անվավեր։ Միաժամանակ, ՌԴ ԱԳՆ-ն մեկնաբանել է Արմեն Սարգսյանի` նախագահի պաշտոնում ընտրվելը։ ՌԴ նախագահ Վլադիմիր Պուտինը շնորհավորել է Արմեն Սարգսյանին։
Մարտի 1–ից ուժի մեջ մտավ «Դեղատոմսերի ձևերը, դեղատոմսեր գրելու, դեղեր բաց թողնելու (ներառյալ՝ էլեկտրոնային եղանակով) կարգը, ինչպես նաև դեղերի և դեղանյութերի հաշվառման կարգը սահմանելու մասին» կառավարության որոշումը, համաձայն որի երկրում գրանցված 4700 անուն դեղերից 2700–ը բաց կթողնվեն բացառապես դեղատոմսով։ Դեղատոմսով կվաճառվեն հակաբիոտիկներ, հորմոնալ և կոդեին պարունակ դեղերը, հուլիսի 1–ից դեղատոմսով կվաճառվի նաև ներարկումային և օնկոլոգիական դեղորայքը, իսկ հոկտեմբերի 1–ից` մնացած բոլոր դեղերը, որոնք նախատեսված են կառավարության որոշմամբ։ «Նովոստի–Արմենիա» գործակալությունը ներկայացնում է 20 ամենապահանջված և հաճախ վաճառվող դեղերը, որոնք առաջվա պես հնարավոր կլինի գնել առանց դեղատոմսի։ Մենք նաև ներկայացնում ենք թոփ 20 դեղերը, որոնք այսուհետ վաճառվելու են դեղատոմսով։
ՀՀ նախագահ Սերժ Սարգսյանը չեղյալ հայտարարեց հայ-թուրքական արձանագրությունները։
Օրեր առաջ Հայաստանը ցնցվեց ահասարսուռ դեպքից` Մեծամորի աղբանոցում հայտնաբերվեց արական սեռի նորածնի դի։ Արդեն հաջորդ օրը իրավապահները հայտնեցին, որ պարզվել է նորածնին աղբանոցը նետած մոր ինքնությունը, ինչպես նաև միջադեպի մանրամասները։ Այս սարսափելի դեպքի մասին խոսել է նաև հենց մայրը` 37–ամյա Պայծառը։
Հայաստան է ժամանել Վրաստանի վարչապետ Գիորգի Կվիրիկաշվիլին։–0–
2024 թվականին եկամուտների հայտարարագիր ներկայացնող քաղաքացիները հայտարարագիր ներկայացնելու համար նախևառաջ պետք է իրականացնեն անձի նույնականացման գործընթաց և ձեռք բերեն էլեկտրոնային ստորագրություն. ՎԻԴԵՈ