ԵՐԵՎԱՆ, 10 դեկտեմբերի./Նովոստի–Արմենիա/. «Ուրալյան ավիաուղիները» թույլտվություն են ստացել Ռոսավիացիայի կողմից Օմսկ–Երևան չվերթն իրականացնելու համար։
Ինչպես գրում է «Новый Омск» հրատարակությունը, գերատեսչության հաղորդմամբ, դեպի Հայաստան իրականացվող չվերթերի առավելագույն հաճախականությունը կազմում է շաբաթական երկու անգամ։ Ավիաընկերությունը դեռ չի հաղորդում, թե կոնկրետ երբ է գործարկվելու չվերթը։
Թույլտվության ստացումը չի երաշխավորում թռիչքների մեկնարկ։ Երկու տարի առաջ դեպի Երևան թռիչքներ իրականացնելու թույլտվություն էր ստացել «ԻրԱէրո» ավիաընկերությունը, սակայն չվերթը մինչև հիմա չի գործարկվել։
2017 թ.–ի արդյունքում, Հայաստանը ներառվել է երկրների թոփ եռյակում, որոնք Օմսկի բնակիչներն ընտրել են մշտական բնակություն հաստատելու համար։ Հայաստանի հետ Օմսկի մարզի առևտրաշրջանառությունը, Օմսկի մաքսատան տվյալներով, 2018 թ.–ի հունվար–սեպտեմբերին գերազանցել է 1,2 մլն դոլարը։
2017 թ.–ից չափահաս ռուսաստանցիները կարող են Հայաստան այցելել առանց վիզայի, այսինքն` ներքին անձնագրով, սակայն միայն օդային և ուղիղ չվերթով։ Գնացքով ճամփորդելու դեպքում արտասահմանյան անձնագիրը պարտադիր է։–0–