Մամիաշվիլին պետք է պատասխան տա հայ ըմբիշ Միհրան Հարությունյանի հասցեին ուղղած խոսքերի համար. իրավաբան

ԵՐԵՎԱՆ, 22 օգոստոսի. /Նովոստի–Արմենիա/. Հայկական կողմն ունի Լոզանի արբիտրաժային մարզական դատարան դիմելու բոլոր հնարավությունները` պահանջելով Ռուսաստանի ըմբշամարտի ֆեդերացիայի նախագահ Միխայի Մամիաշվիլուն պատասխանատվության ենթարկել հայ ըմբիշ Միհրան Հարությունյանի հասցեին հնչեցրած խոսքերի համար, երկուշաբթի լրագրողներին ասաց իրավաբան Հայկազ Մակարյանը։

«Մամիաշվիլու` «եթե ես խանգարեի Միհրան Հարությունյանին, նա չէր հայտնվի Օլիմպիական խաղերին» խոսքերը վկայում են պաշտոնեական լիազորությունները չարաշահելու մասին։ Իրավական տեսանկյունից այդ անհիմն արտահայտությունը կարող է դատական հայցի հիմք լինել»,– ասաց Մակարյանը։

Հայ ըմբիշը զրկվեց օլիմպիական ոսկուց կանխակալ մրցավարության պատճառով, ինչի հետևանքով հաղթանակը շնորհվեց նրա մրցակից սերբ Դավոր Շտեֆանեկին:

Մակարյանն ավելացրեց, որ Օլիմպիական խարտիայի 23–րդ հոդվածը պատիժներ և սահմանափակումներ է նախատեսում մարզական էտիկետը խախտող անձանց համար։

«Դա առնվազն հրապարակային հայտարարության տեսքով սպառնալիք էր, պետք է քննություն սկսել և պարզել դրա պատճառը։ Հայկական կողմը կարող է պահանջել պաշտոնանկ անել Մամիաշվիլուն»,– ասաց նա։

Բացի այդ, իրավաբանի խոսքով, մրցավարների որոշումը, ըստ որի Հարությունյանը զրկվեց օլիմպիական ոսկուց, կարելի է բողոքարկել դատարանում մեկ ամսվա ընթացքում։

«Դա կարող է ՄՕԿ–ի ներքին կանոնների կոպիտ խախտում լինել, պետք է քննություն սկսել և որակազրկել մրցավարին»,– ասաց Մակարյանը։ -0-