ԵՐԵՎԱՆ, 15 հոկտեմբերի. /Նովոստի–Արմենիա/. Ազգային անվտանգության ծառայության ղեկավար, Հայաստանի ֆուտբոլի հավաքականի նախագահ Արթուր Վանեցյանը երկուշաբթի այցելել է հավաքականին մարզման ընթացքում և շփվել է լրագրողների հետ։
«20 տարում փչացրածը հնարավոր չէ ուղղել 20 օրում։ Հենց նոր խոսեցի մեր հավաքականի ֆուտբոլիստների հետ առաջիկա խաղի և ապագայի ծրագրերի մասին։ Նրանց լավ տրամադրվածություն մաղթեցի, որ կարողանան հավաքվել և վաղը լավ ֆուտբոլ ցույց տալ»,– ասաց Վանեցյանը։
Հայաստանի ֆուտբոլի հավաքականը շաբաթ սեփական դաշտում պարտվել է Ջիբրալթարի թիմին 0։1 հաշվով Ազգերի լիգայի որակավորման փուլի խաղում։
Վանեցյանի խոսքով, շուտով Ֆեդերացիան կներկայացնի հայկական ֆուտբոլի զարգացման երկարաժամկետ ծրագիր, որի պտուղները երկրպագուները կտեսնեն 4-5 տարի անց։
Загружается новость ... "Лево"
«Այս ծրագիրն ուղղված է մանկապատանեկան ֆուտբոլի զարգացմանը։ Մեզ համար ամենակարևորն այն է, որ Հայաստանում շատ լինեն պրոֆեսիոնալ ֆուտբոլիստները, որ հետագայում հավաքականի մարզիչը մեծ ընտրություն ունենա»,– նշեց ՀՖՖ ղեկավարը։
Նրա խոսքով, այս պահին Հայաստանում կա ընդամենը 120 պրոֆեսիոնալ մարզիկ, որոնցից մարզիչը պետք է ընտրություն կատարի։
«Արդեն մոլուցք է դարձել արտերկրում հայկական արմատներով խաղացողներ փնտրելը։ Որոշ խաղացողների հետ հաջողվում է ինչ–որ պայմանավորվածությունների հասնել, ոմանց հետ` ոչ։ Չեմ ուզում թերագնահատել մեր հավաքականի խաղացողներին, բայց եթե օբյեկտիվ նայենք արդյունքներին, հասկանալի է դառնում, որ դրանք մեզ չեն բավարարում»,– ասաց Վանեցյանը։
Ըստ նրա, շուտով կոնկրետ աշխատանք կսկսվի, և արդյունքը չի ուշանա։
«Ամեն դեպքում կոչ եմ անում մեր երկրպագուներին լցվել համբերությամբ և վստահել մեզ։ Ֆուտբոլը շատ զգայուն թեմա է։ Մեր ազգը շատ ծանր է տանում բոլոր անհաջողությունները։ Առաջիկայում կոնկրետ քայլեր կտեսնեք»,– նշեց ՀՖՖ նախագահը։
Այժմ Մակեդոնիան ունի ինը միավոր։ Ջիբրալթարը, չնայած հաղթանակին, չորրորդն է, բայց արդեն հասել է Հայաստանին` երկու հավաքականն էլ երեք հանդիպումներից հետ ունեն երեքական միավոր։ Լիխթենշթեյնը նույնպես երեք միավոր ունի, բայց երկու խաղից հետո։ -0-
