Հայ ծանրամարտիկի դոպինգ–թեստի ստուգումը դրական արդյունք է տվել

ԵՐԵՎԱՆ, 7 հուլիսի. /Նովոստի–Արմենիա/. 2008 թ.–ի Պեկինի օլիմպիական խաղերի ժամանակ Տիգրան Մարտիրոսյանի դոպինգ–թեստերի կրկնակի ստուգումը դրական արդյունք է տվել։ Դրական արդյունք են տվել նաև թուրք Սիբել Օզքանի դոպինգ–թեստերը, հաղորդում է rsport.ru–ն` հղում անելով Ծանրամարտի միջազգային ֆեդերացիայի մամուլի ծառայությանը (IWF)։

IWF–ի գործկոմն ավելի վաղ որոշել էր, որ 2008 և 2012 թթ.–ի օլիմպիական խաղերի դոպինգ–թեստերի երեք և ավելի դրական արդյունքի դեպքում կորակազրկվեն այն երկրները, որոնց ներկայացնում են այդ մարզիկները։ Տիգրան Մարտիրոսյանը Պեկինում նվաճել է բրոնզե մեդալ մինչև 69 կգ քաշային կարգում, իսկ Սիբել Օզքանը` արծաթե մեդալ մինչև 48 կգ քաշային կարգում։

Մարզիկների մոտ հայտնաբերվել է ստանոզոլոլի ստերոիդ, իսկ Մարտիրոսյանի թեստը ցույց է տվել նաև դեհիդրոքլորոմեթիլտեստոստերոնի հետքեր։ Այս դեղորայքը հայտնաբերվել է նաև ադրբեջանցի ծանրամարտիկ Սարդար Հասանովի դոպինգ–թեստում։ Բոլոր երեք մարզիկները ժամանակավորապես հեռացվել են մրցումներից, նրանց նկատմամբ հարուցվել են կարգապահական գործեր։ -0-