ԵՐԵՎԱՆ, 14 փետրվարի. /Նովոստի–Արմենիա/. «Արսենալի» հայ կիսապաշտպան Հենրիխ Մխիթարյանը խոսել է իր թիմակից Մեսութ Օզիլի մասին։
Մխիթարյանի խոսքով, Մեսութ Օզիլն աշխարհի լավագույն ֆուտբոլիստներից է, լավագույնն իր խաղային դիրքում, հաղորդում է Express բրիտանական հրատարակությունը։
«Բոլորը գիտեն, որ Օզիլն աշխարհում լավագույն խաղացողներից է։ Մեծ երջանկություն է խաղալ նրա հետ։ Նա շատ լավ գլուխ է հանում ֆուտբոլային մարտավարությունից, հիանալի տեսնում է դաշտը, ունի արտակարգ տեխնիկա, լավագույնն է իր դիրքում», – հայտարարել է Մխիթարյանն ու նշել, որ անցնելով «Արսենալ»` շատ ոգևորված էր Օզիլի հետ խաղալու հեռանկարով։
Հենրիխ Մխիթարյանը Լոնդոնի «Արսենալ» է տեղափոխվել «Մանչեսթեր Յունայթեդից» Ալեքսիս Սանչեսի հետ փոխանակման շրջանակում։ Տեղափոխվելուց հետո Մխիթարյանի աշխատավարձը կազմում է շաբաթական 200 հազար ֆունտ ստեռլինգ։-0-