ԵՐԵՎԱՆ, 28 հոկտեմբերի. /Նովոստի-Արմենիա/. Հոկտեմբերի 30-ին Երևանում կանցկացվի Street Workout-ի Հայաստանի 4–րդ առաջնությունը, տեղեկացրեց Street Workout հայաստանյան ֆեդերացիայի ղեկավարման խորհրդի նախագահ Ղազար Հակոբյանը:
«Ազգային առաջնության անցկացման նպատակն է Հայաստանում մասսայական սպորտի և առողջ ապրելակերպ զարգացումը», - ուրբաթ «Նովոստի-Արմենիա» մամուլի կենտրոնում լրագրողներին ասաց Հակոբյանը:
«Կազմակերպության զարգացմանը զուգահեռ մենք անցկացրել ենք բազմաթիվ փառատոններ և, անկասկած, արդեն առաջնություններ ենք անցկացնում, քանի որ Street Workout շարժումն աշխարհում բավական ակտիվ է զարգանում: Այս տարի մենք արդեն չորրորդ առաջնությունն ենք անցկացնում Հայաստանում, որն ունի ավելի քան 25 մասնակից` Հայաստանի գրեթե բոլոր մարզերից», - ավելացրեց Հակոբյանը:
Նա նշեց, որ մրցույթին կհետևի Սպորտի և երիտասարդության հարցերի նախարար Հրաչյա Ռոստոմյանը: «Այդպիսով, մենք ակնկալում ենք պետության կողմից ավելի մեծ ուշադրություն մեր կազմակերպության և գործունեության նկատմամբ։ Մինչ այսօր մենք կազմակերպել ենք ավելի քան 70 միջոցառում, մասնակցել ենք միջազգային փառատոնների, առաջին անգամ ներկայացրել ենք Հայաստանը աշխարհի առաջնությանը», - նշեց Հակոբյանը:
Street Workout հայաստանյան ֆեդերացիայի ղեկավար Արթուր Հարությունյանն իր հերթին ավելացրեց, որ առաջնության բոլոր մասնակիցներն անցել են ընտրական փուլ, որը կազմակերպվել է առցանց` ուղարկված տեսագրությունների միջոցով։
«Մենք ունենք 28 մասնակից` Հայաստանի և Արցախի 14 քաղաքներից։ Առաջնությունը կանցկացվի երկու փուլով։ Բոլոր մասնակիցներին կտրամադրվի երեք րոպե։ Այդ ընթացքում նրանք կցուցադրեն իրենց հնարքները», – ասաց Հարությունյանը։
Առաջնությունը կունենա երեք մրցավար, ովքեր կգնահատեն աթլետների ուժային և դինամիկ վարժություններն ու ցատկերը։ Գլխավոր մրցավարը կգնահատի այդ հնարքների կոմբինացիան։
Նրա խոսքով` երկրորդ փուլին կմասնակցեն հինգ ուժեղագույն աթլետները, որոնք հաղթահարել են առաջին փուլը։ Նրանք կրկին հանդես կգան երեք րոպե տևողությամբ համարով, ինչից հետո կհրապարակվեն ուժեղագույն աթլետների անունները։
«Առաջնության մասնակիցների թվում են 2013 և 2014 թթ.–ի Street Workout առաջնությունների չեմպիոնները, ովքեր ևս կպայքարեն մրցանակների համար։ Հաղթողը կներկայացնի Հայաստանը 2017 թ.–ին նախատեսված աշխարհի առաջնության ժամանակ», – ավելացրեց Հարությունյանը։
Առաջնության նպատակն է Հայաստանում քարոզել առողջ ապրելակերպ, մասսայականացնել բակային մարզումների մշակույթը, նպաստել ֆիզիկապես առողջ, ուժեղ և խելացի սերնդի ձևավորմանը, պայքարել ծխախոտի և ալկոհոլի օգտագործման վատ սովորությունների դեմ:
Առաջնությունն անցկացվում է Երևանի քաղաքապետարանի աջակցությամբ։ –0–
Ծանոթացեք լուրերին առաջինն ու քննարկեք դրանք մեր Telegram-յան ալիքում
