ԵՐԵՎԱՆ, 28 նոյեմբերի. /Նովոստի-Արմենիա/. Մեր տրամադրության, ինչ-որ բան սովորելու և հիշողության վրա ազդում է այն սնունդը, որ մենք օգտագործում ենք: Ուղեղի աշխատանքը կախված է օրգանիզմ մտնող սննդարար նյութերից, արյան մեջ շաքարի պարունակությունից և թթվածնից: Ճիշտ սննդակարգը, որը ներառում է բոլոր անհրաժեշտ վիտամինները, հանքային նյութերը և այլ սննդարար նյութեր, օգնում է բարելավել հիշողությունը, բարձրացնել մտավոր ընդունակությունները, նվազեցնել վերադարձող հիվանդությունների, օրինակ, Ալցհայմերի հիվանդության ռիսկը, գրում է
feeling-good.ru կայքը:
Եվ այսպես, աշխատունակությունը բարձրացնող սննդամթերքը պետք է պարունակի`
1. Օմեգա 3 ճարպաթթուներ
Ուղեղը 70 տոկոսով բաղկացած է ճարպից և պահանջում է Օմեգա 3 անփոխարինելի ճարպաթթուներ, իսկ դրանք պետք է ստացվեն սննդի հետ դրա նորմալ գործունեության և զարգացման համար: Օմեգա 3 ճարպաթթուները հիմնականում պարունակվում են ձկան` սաղմոնի, իշխանի, սկումբրիայի մեջ, կտավատի սերմերում և ձեթում, ընկուզեղենում և արևածաղկի սերմերում:
2. Սպիտակուց
Սպիտակուցն ուղեղի ճիշտ կենսագործունեության համար անհրաժեշտ կարևոր սննդարար նյութերից է: Ճարպի ցածր տոկոսով որակյալ պրոտեինն անհրաժեշտ է ուղեղը սնուցելու համար: Ուղեղի համար անհրաժեշտ է այնպիսի ամինաթթուների առկայությունը, ինչպիսիք են ացետիլխոլինը (պետք է լավ հիշողության համար), սերոտոնինը (լավ տրամադրության համար): Այս դեպքում լավ ընտրություն կարելի է համարել հավկիթը, ընդեղենը, տոֆու պանիրը, հավի միսը, հատկապես` կրծքամիսը:
3. Հակաօքսիդանտներ
С և А վիտամիններով և բետա-կարոտինով հակաօքսիդանտները կարևոր են ուղեղի կարողությունները բարձրացնելու համար: Դրանք պաշտպանում են ուղեղի բջիջներն ազատ ռադիկալների ներգործությունից: Մրգերն ու բանջարեղենները, հատկապես կարմիր և նարնջագույն, մեծ քանակությամբ հակաօքսիդանտներ են պարունակում:
4. Բարդ ածխաջրեր
Բարդ ածխաջրեր են պարունակվում ամբողջահատիկ հատիկավորներում և ամբողջահատիկի հացում (վարսակ, տարեկան, դարչնագույն բրինձ): Դրանք էներգիայի, սպիտակուցի և վիտամինների գերազանց աղբյուր են: Այդ մթերքներն ուղեղն ապահովում են գլյուկոզայով` աստիճանաբար էներգիա տալով, առանց առաջացնելու շաքարի կտրուկ արտանետում և դրա մակարդակի բարձրացում արյան մեջ: Դրանով իսկ նպաստում են ուղեղի մտավոր ունակությունների բարձրացմանը: -0-