Ատենակալները Մայքլ Ջեքսոնի անձնական բժիշկին մեղավոր են ճանաչել «փոփ երաժշտության արքայի» մահվան մեջ
![Ատենակալները Մայքլ Ջեքսոնի անձնական բժիշկին մեղավոր են ճանաչել «փոփ երաժշտության արքայի» մահվան մեջ Ատենակալները Մայքլ Ջեքսոնի անձնական բժիշկին մեղավոր են ճանաչել «փոփ երաժշտության արքայի» մահվան մեջ](/upload/iblock/7f8/trb70z5t7psev3xtqwgnc1velmndars6.jpg)
Մայքլ Ջեքսոնի անձնական բժիշկ Քոնրադ Մյուրեի գործը քննող ատենակալները բժիշկին մեղավոր են ճանաչել երգչին ոչ դիտավորությամբ սպանելու մեջ, երեքշաբթի հայտնում է Ռոյթերս գործակալությունը:
«Փոփ երաժշտության արքա» Մայքլ Ջեքսոնը մահացել է 2009 թվականի հունիսի 25-ին՝ կյանքի 51-րդ տարում Լոս Անջելեսում: Քննության վարկածով, Մյորեյը նրան պրոպոֆոլ դեղամիջոցի չափազանց մեծ չափաբաժին է տվել, որն այլ դեղամիջոցների, այդ թվում՝ հանգստացնող դեղերի հետ փոխազդեցության հետևանքով երգչի մահվան պատճառ է դարձել:
Բժիշկի պաշտպանը պնդում էր, որ երգիչը հանգստացնող և ցավազրկող դեղամիջոցներից կախում է ունեցել, և ինքն է պրոպոֆոլի մահացու չափաբաժին ընդունել:
Ատենակալները սկսել են վճռի կայացման նիստն ուրբաթ՝ նոյեմբերի 4-ին, երբ մեղադրանքի և պաշտպանության կողմերը հանդես են եկել իրենց եզրափակիչ խոսքերով Մյուրեի՝ արդեն վեց շաբաթ տևող լսումներում: Այդ օրը նրանց չի հաջողվել համաձայնեցնել որոշումը, և յոթ տղամարդկանցից ու հինգ կանանցից բաղկացած ատենակալների նիստը տեղափոխվել է երկուշաբթի: Մեղադրական որոշումը նրանք միաձայն են ընդունել:
Ամերիկյան լրատվամիջոցները հաղորդում են, որ վճռի հրապարակման ժամանակ դատարանում ներկա են եղել Մայքլ Ջեքսոնի հարազատները, այդ թվում՝ նրա ավագ քույր Լա Թոյան և մայրը՝ Քեթրինը: Ատենակալների կազմած փաստաթղթի ընթերցման ժամանակ Լա Թոյան անձայն լալիս էր:
«Մայքլը նայում էր մեզ»,- ասել է նա՝ լքելով դատարանի դահլիճը:
Քեթրին Ջեքսոնը հայտարարել է, որ ինքը կասկած չուներ դատավարության մեղադրական եզրակացության վերաբերյալ:
Դատարանի շենքի շուրջ երկուշաբթի հավաքվել էին Ջեքսոնի հարյուրավոր երկրպագուներ, ովքեր, տեղեկանալով ատենակալների որոշումը, սկսել են վանկարկել՝ «Շնորհակալություն, դատավոր»:
Ինքը Մյուրեյը վճռի ընթերցման պահին նստած է եղել անհողդողդ դեմքով: Որոշման հրապարակումից անմիջապես հետո գործը քննող դատավոր Մայքլ Պաստորը հրահանգել է ձերբակալել բժիշկին առանց գրավի դիմաց ազատ արձակելու հնարավորության: Մյուրեյը ձերբակալված կմնա առնվազն մինչև նոյեմբերի 29-ը, երբ դատարանը կկայացնի նրա դատավճիռը:
Պաստորը հայտնել է, որ Մյուրեի «անպատասխանատու վարքը» վտանգ է ներկայացնում հասարակական անվտանգության համար, և նրա ձերբակալությունը «նպատակահարմար է»:
Ինչպես եզչափակիչ խոսքում ասել է դատախազ Դևիդ Ուոլգրենը, Մայքլ Ջեքսոնը «սեփական կյանքով է վճարել» իր բժիշկի հանցավոր անփութության համար, ում մեղքով, բացի մնացածից, առանց հայր են մնացել երեք երեխաներ: Մյուրեյը, մեղադրանքի կարծիքով, խախտել է վստահելի հարաբերություններն իր հիվանդի հետ, ինչը նրան մահվան է հանգեցրել: Դատախազն ասել է նաև, որ Մյուրեյը խախտում էր Հիպոկրատի երդումը և իրավաբանական պարտավորությունները՝ Ջեքսոնին որպես քնաբեր միջոց պրոպոֆոլ տալով:
Մյուրեի դատապաշտպան Էդ Չերնոֆն իր հերթին ատենակալներին ներկայացվող իր խոսքում ասել է, թե իր պաշտպանյալի մեղավորության ապացույցներ չկան, և փորձել է մահվան համար մեղքը դնել հենց երգչի վրա:
Ավելի վաղ ինքը Մյուրեյը, ով չի բացառում, որ պրոպոֆոլի ոչ մեծ չափաբաժիններ է տվել Ջեքսոնին, հայտարարել էր այն մասին, որ իրեն մեղավոր չի ճանաչում ոչ դիտավորությամբ սպանության մեջ:
Իրավաբանների ելույթից հետո դատավոր Մայքլ Պաստորը դիմել է ատենակալներին և ասել, որ նրանք կարող են ամբստանյալին մեղավոր ճանաչել, նույնիսկ եթե կհամարեն, որ Ջեքսոնն ինքն է մեղավոր իր մահվան մեջ, բայց բժիշկը ոչինչ չի ձեռնարկել այդ ողբերգությունը կանխելու համար: Պաստորն ասել է նաև, որ ատենակալները կարող են Մյուրեին անմեղ ճանաչել, եթե կհամարեն, որ նրա գործողությունները հայտնի երգչի մահվան օրը ոչ դիտավորյալ են եղել:
Մյուրեին Ջեքսոնի մահվան մեջ մեղավոր ճանաչելուց հետո բժիշկը կարող է դատապարտվել չորս տարի ազատազրկման և զրկվել բժշկական գործունեության արտոնագրից: -0-