ԵՐԵՎԱՆ, 14 օգոստոսի. /Նովոստի-Արմենիա/. On the Beach տուրիստական գործակալության՝ 100 հյուրանոցներում անցկացրած աշխատակիցների հարցումը ցույց է տվել, թե հյուրանոցների աշխատողները որ զբոսաշրջիկներին են համարում ամենակոպիտը, և որոնց՝ ամենաքաղաքավարին, հայտնում է
vokrugsveta.ru կայքը։
Ռուսները, հարցումների արդյունքներով, ճանաչվել են ամենաանդաստիարակ ճանապարհորդներ՝ այդպես է նրանց որակել հյուրանոցների հարցված աշխատողների 31 տոկոսը։ Ռուս զբասաշրջիկներին նաև համարում են ամենաաղմկոտը (8%), թեև այդ ցուցանիշով նրանք զիջում են իսպանացիներին (25%) և բրիտանացիներին (34% )։
Երկրորդ տեղում գերմանացի ճանապարհորդներն են, որոնց բացասական են որակել հյուրանոցների աշխատողների 20 տոկոսը։ Գռեհիկների եռյակը եզրափակում են ֆրանսիացիները, ովքեր հավաքել են ձայների տասը տոկոսը։
Իսկ ամենաբարյացակամ զբոսաշրջիկները բրիտանացիներն են՝ նրանց այդպես է բնութագրում հյուրանոցների աշխատակիցների 32 տոկոսը։ Գովեստի են արժանի նաև շվեդները (16%) և նորվեգացիները (10%)։
Բրիտանացիները նաև արժանացել են ամենաշռայլ զբոսաշրջիկների կարգավիճակին՝ բարմենների, մատուցողների և աղախինների խոսքով, նրանք բոլորից հաճախ են թեյավճար թողնում։ Այդ հարցում շռայլ են նաև շվեդներն ու ամերիկացիները։
Պարզվել է նաև, որ բրիտանացիները բոլորից հաճախ են դժգոհում կեցության պայմաններից։ Նրանցից բացի, անձնակազմին դժգոհություններ են սիրում հայտնել ֆրանսիացիներն ու գերմանացիները։ -0-