ԵՐԵՎԱՆ, 13 նոյեմբերի. /Նովոստի- Արմենիա/. «Ձայնը» նախագծի ամենավառ մասնակիցներից մեկը՝ Անդրեյ Դավիդյանը, Բոտկինի անվան հիվանդանոցի վերակենդանացման բաժանմունք էր տեղափոխվել նախորդ ուրբաթ:
Բժիշկները նրան ախտորոշել էին իշեմիկ ինսուլտ: Ավելի ուշ երաժիշտը կոմայի մեջ հայտնվեց: Ցավոք, այս դեպքում բժշկությունն անզոր գտնվեց, և կիրակի լույս գիշերը՝ նոյեմբերի 13-ին, Անդրեյ Դավիդյանը մահացավ: Նա 60 տարեկան էր:
«Քիչ առաջ խոսում էի Մոսկվայի դատախազության ներկայացուցիչների հետ, ովքեր պարզելու են Անդրեյի հանկարծակի մահվան պատճառները,-
kp.ru-ին է պատմել նրա տնօրեն Յուրի Դենիսովը: - Ամենայն հավանականությամբ, դատախազությունը հարցեր ունի ուղղելու մեր բժշկությանը»:
Դենիսովը հայտնել է, որ երեք շաբաթ առաջ Անդրեյը կույր աղու վիրահատություն էր տարել ընդհանուր անզգայացմամբ:
«Այնուհետև, չգիտես ինչու, ևս մեկ վիրահատություն պահանջվեց: Ու կրկին ընդհանուր անզգայացմամբ: Ինչու՞: Անհասկանալի է: Սովորաբար բորբոքված կույր աղին հեռացնում են տեղային անզգայացմամբ: Անդրեյը նոր էր սկսում կազդուրվել հիվանդանոցից հետո, երբ իշեմիկ ինսուլտ ունեցավ: Կրկին նրան տարան հիվանդանոց, այնտեղ սրտի կանգ եղավ: Երեք օր անցկացրեց կոմայում, իսկ գիշերը մահացավ»,- ասել է նա:
«Դրան դժվար է հավատալ: «Ձայնից» հետռո ստեղծագործական վերելք էր ապրում, նրան ճանաչում էին փողոցում, հրավիրում հյուրախաղերի: Մենք միասին ելույթ ենք ունեցել Ամերիկայում: Նա առհասարակ բացառիկ էր, երկրորդ այդպիսին, ուրիշ Անդրեյ չկա: Եվ հանկարծ մարդը, ով լի է կյանքով, ծրագրերով, լավատեսությամբ, այսքան հանկարծակի հեռացավ»,- պատմել է Դենիսովը:
Անդրեյ Դավիդյանն աշխատում էր «СВ», «Ռոք ատելիե», «Նահանջ տարի» խմբերի հետ, մասնակցում «Եզրափակելով շրջանը» երգի ձայնագրություններին ռուսական ռոքի աստղերի հետ: Նրան ճանաչում էր բերել «Ձայնը» երկրորդ նախագծի մասնակցությունը:
«Ձայնի» վառ ելույթից հետո երաժիշտը սկսեց համերգներ և ստեղծագործական երեկոներ ունենալ: Յուրաքանչյուր ելույթ յուրահատուկ մթնոլորտ էր, տարբեր երաժշտական գործիքների վիրտուոզ տիրապետում և ձայնային շշմեցնող իմպրովիզացիաներ: Անդրեյ Դավիդյանի երգացանկն ընդգրկում էր ոչ միայն հայտնի կոմպոզիցիաներ, այլ նաև հեղինակային երգեր: -0-