Ամենայն Հայոց Կաթողիկոսն այցելել է «Թումո» ստեղծարար տեխնոլոգիաների կենտրոն

ԵՐԵՎԱՆ, 11 նոյեմբերի. /Նովոստի–Արմենիա/. Նախօրեին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսն այցելել է Երևանի «Թումո» ստեղծարար տեխնոլոգիաների կենտրոն Մայր Աթոռ Սուրբ Էջմիածնի տեղեկատվական համակարգից։

 Ամենայն Հայոց Կաթողիկոսը, ուղեկցությամբ «Սիմոնյան» կրթական հիմնադրամի նախագահ, «Թումո» կենտրոնի հիմնադիր Սեմ Սիմոնյանի և կենտրոնի հոգաբարձուների խորհրդի անդամ Բեկոր Փափազյանի, ծանոթացել է  կենտրոնի պայմաններին և ուսումնական ծրագրերին:

«Թումո» հաճախող պատանիները Վեհափառ Հայրապետին ներկայացրել են  իրենց ստեղծած նոր խաղերն ու ծրագրերը: Իր հերթին Ամենայն Հայոց Կաթողիկոսը պատասխանել է նրանց հարցերին:

Վերջում Գարեգին Բ Հայրապետն իր օրհնությունը բերել է կենտրոնի հիմնադրին, աշխատակազմին և սաներին` բարձր գնահատելով ժամանակակից պահանջներին համապատասխան կրթություն ապահովելուն ուղղված ջանքերը:

Նորին Սրբությունը հույս է  հայտնել, որ առաջիկայում նմանատիպ կենտրոն կհաստատվի նաև Էջմիածնում:

Այցի ընթացքում Վեհափառ Հայրապետին ուղեկցել ն Մայր Աթոռի Վարչատնտեսական բաժնի տնօրեն Գերաշնորհ Տ. Մուշեղ եպիսկոպոս Բաբայանը և Քրիստոնեական դաստիարակության կենտրոնի տնօրեն Գերաշնորհ Տ. Վարդան եպիսկոպոս Նավասարդյանը:

Կենտրոնի ստեղծման օրվանից այստեղ ուսումնառություն են անցել ավելի քան 10 հազար մարդ:

Ներկայում, «Թումո» կենտրոնի մասնաճյուղեր են գործում Դիլիջանում, Գյումրիում, Ստեփանակերտում:-0-