ԵՐԵՎԱՆ, 28 հոկտեմբերի. /Նովոստի–Արմենիա/. Հայաստանի կարևորագույն խնդիրներից մեկը գործազրկությունն է` այդ կարծիքին է «Հայաստանի ուսանողների կենսակերպի և Բոլոնյան գործընթացի գնահատականի» ուսումնասիրությանը մասնակցած ուսանողների 25.3 տոկոսը, հայտնել է Քաղաքական և սոցիոլոգիական խորհրդատվությունների ինստիտուտի (IPSC) վերլուծաբան Սամվել Մանուկյանը։
Հայաստանի կրթության և գիտության նախարարության պատվերով IPSC անցկացրած հետազոտության շրջանակում հարցում է անցկացվել երևանյան պետական բուհերի բակալավրիատների և մագիստրատուրաների 1221 սովորողների շրջանում։ Նաև 20 հարցազրույց է անցկացվել կրթության ոլորտի փորձագետների և ուսանողական միջավայրի 6 ֆոկուս–խմբերում։
Մանուկյանի խոսքով, հարցման մասնակցած ուսանողների գրեթե 20 տոկոսը երկրի հիմնական խնդիր է անվանել աղքատությունը, 19.8 տոկոսը` երկրի անվտանգության ապահովումը, 19.6 տոկոսը` տնտեսության թույլ զարգացումը և 19.3 տոկոսը` արտագաղթը։
Միաժամանակ ուսանողների 58.8 տոկոսը կարծում է, որ յուրաքանչյուր մարդ ինքն է պատասխանատու իր տնտեսական բարեկեցության համար, իսկ 27.7 տոկոսը պատճառ է համարում սոցիալական անհավասարությունն ու աղքատությունը։ «Ուսանողների 33 տոկոսը բնական է համարում, որ հարուստներն ու պաշտոնյաներն անպաժելի կերպով խախտում են օրենքներ, և մարդիկ, ովքեր կհարստանան և իշխանության ղեկին կհայտնվեն, նույն կերպ են իրենց պահելու։ Այս կարծիքի հետ համաձայն չէ ուսանողների 66.6 տոկոսը»,– ասաց Մանուկյանը։
Հատկանշական է, որ հարցվածների մոտ 6.8 տոկոսը չգիտի, թե սոցիալական որ կարգում են իրենք ապրում, ճիշտ պատասխանը հայտնի է միայն ուսանողների 12.4 տոկոսին, ովքեր հասարակագիտական մասնագիտություններ են ստանալու։
Փորձագետի խոսքով, ուսանողների մոտ 29.2 տոկոսը սատարում են հասարակական տարբեր շարժումների։ Հատկանշական է, որ հասարակական ակտիվություն են դրսևորում միայն այն ուսանողները, ովքեր ամենից քիչ են հասկանում տարբեր երևույթների էությունը, ինչպես նաև դրանց լուծման տարբերակները։ «Վերջին օրինակն էլեկտրաէներգիայի սակագների թանկացման դեմ ամռանը բարձրացած ալիքն էր, երբ երիտասարդությունը չկարողացավ արդյունավետ երկխոսություն ծավալել իշխանությունների հետ։ Ինչու՞։ Որովհետև չունեին դրա համար անհրաժեշտ գիտելիքներ»,– նշեց նա։
Հայաստանի կրթության և գիտության նախարար Արմեն Աշոտյանն իր հերթին ասաց, որ հետազոտությունը շատ հետաքրքրիր տեղեկություն բացահայտեց, որը երևան է բերում կրթության ոլորտի խնդիրները, որոնք թույլ են տալիս տեսնել քաղաքական և քաղաքացիական հեռանկարների զարգացման ներկան և ապագան։
«Մեզ հետաքրքիր էր ուսանողության քաղաքականացվածության աստիճանը։ Պարզվեց, որ ուսանողների շրջանում կուսակցականության ցուցանիշը կրկնակի փոքր է, քան հասարակությունում։ Այդպիսով, որքան ցածր է ուսանողի հասարակագիտական հիմնարար գիտելիքների մակարդակը, այնքան հեշտությամբ է նա ընդգրկվում տարբեր գործընթացներում` չհասկանալով դրա պատճառն ու խորությունը։ Դա մարտահրավեր է քաղաքական բոլոր ուժերի և Կրթության և գիտության նախարարության համար, որը պետք է շեշտադրումն անի բուհերում հասարակագիտական գիտությունների դասավանդման որակի բարձրացման վրա»,– կարծում է Աշոտյանը։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում