ԵՐԵՎԱՆ, 19 նոյեմբերի./Նովոստի–Արմենիա/. Այս տարի ամուսնացան այնպիսի աստղեր, ինչպիսիք են Ջոննի Դեպը, Էշտոն Քաթչերը և անգամ Մոնակոյի արքայազնը։
Ruposters Life–ը ներկայացնում է ռուս և համաշխարհային աստղերի 10 ամենաաղմկահարույց ամուսնությունները, որոնք տեղի են ունեցել անցնող 2015 թ.–ին։
Ջեննիֆեր էնիսթոն և Ջասթին Տերու
Այս աստղային զույգն ամուսնացել է գաղտնի` Լոս Անջելեսի էլիտար թաղամասերից մեկում։ Հարսանիքը «քողարկված է» եղել Տերուի 44–ամյակի տոնակատարության ներքո։ Սակայն լրագրողները, տեսնելով տորթի վրա դրված երկու արձանիկներն ու միջոցառմանը մասնակցող քահանային, միանգամից «գլխի են ընկել»։ Հարսանեկան արարողությանը հրավիրված են եղել զույգի 70 ամենամտերիմ մարդիկ:
Կարլ Ֆիլիպ և Սոֆիա Հելքվիստ
Շվեդիայի արքայազն ու հայտնի մոդելը, ով 2004 թ.–ին արժանացել է «Միսս Շվեդիա» տիտղոսին, ամուսնացել են Ստոկհոլմում գտնվող Թագավորական պալատի եկեղեցում։ Միջոցառմանը ներկա են եղել թագավորական ընտանիքի անդամները, հայտնի քաղաքական գործիչներ և օտարերկրյա միապետեր։ Երբ արքայազնը մատանին դրել է հարսնացուի մատին, հնչել է Coldplay բրիտանական խմբի «Fix You» երգի cover տարբերակը։ Սոֆիա Հելքվիստը դարձել է Շվեդիայի առաջին արքայադուստրը, ով ազնվատոհմ ընտանիքից չէ։
Վերա Բրեժնևա և Կոնստանտին Մելաձե
Հայտնի պրոդյուսերը միայն նախորդ շաբաթ է հրապարակային կերպով հայտարարել, որ «ՎԻԱ Գրա» խմբի նախկին մեներգչուհի Վերա Բրեժնևան իր կինն է, սակայն ԶԼՄ–ները դեռ հոկտեմբերի 24–ին էին տեղեկացրել Իտալիայում կազմակերպված զույգի հարսանեկան արարողության մասին։ Ֆորտե դեյ Մարմի հանգստավայրում զույգի հարաբերությունները պաշտոնապես գրանցել է քաղաքապետ Ումբերտո Բուրատտին։
Քեմերոն Դիաս և Բենջի Մեդդեն
Հայտնի դերասանուհու և Good Charlotte խմբի երաժշտի հարսանեկան արարողությունը տեղի է ունեցել Բևերլի Հիլզում գտնվող Քեմերոնի առանձնատանը։ Միջոցառմանը ներկա են եղել Ռիզ Ուիզերսփունը, Դրյու Բերիմորը, Գվինեթ Փելթրոուն։ Դիասի և Մեդդենի սիրավեպը սրընթաց զարգացում է ունեցել։ Հարսանիքից առաջ զույգը հանդիպել է ընդամենը կես տարի։ Ե՛վ Քեմերոնի, և՛ Բենջիի համար սա առաջին ամուսնությունն է։
Բենեդիկտ Քամբերբեթչ և Սոֆի Հանթեր
Սիրահարները համեստ պսակադրություն են կազմակերպել Ուայթ անգլիական կղզում գտնվող Մոթիսթոուն քաղաքի Սուրբ Պետրոսի և Պողոսի եկեղեցում։ Հարսանեկան արարողությանը հրավիրված են եղել մոտ 40 հյուրեր, այդ թվում` Էնդրյու Սկոտն ու Թոմ Հիդլսթոնը։
Ջոննի Դեպ և Էմբեր Հերթ
Զույգի պսակադրության արարողությունը տեղի է ունեցել Լոս Անջելեսում գտնվող` դերասանի տանը, իսկ խնճույքը կազմակերպվել է 51–ամյա Դեպի անձնական կղզում, որը գտնվում է Բահամներում։ Զույգը ծանոթացել է «Ռոմի օրագիրը» ֆիլմի նկարահանումների ժամանակ, ինչից հետո երկար ժամանակ թաքցրել է հարաբերությունները։
Միլա Կունիս և Էշտոն Քաթչեր
Դերասանները կազմակերպել են գաղտնի պսակադրություն ԱՄՆ–ի անկախության օրը։ Պսակադրությանը ներկա են եղել աստղերի հարազատներն ու մտերիմները։ Միջոցառումը կազմակերպվել է Կալիֆոռնիայում գտնվող Secret Garden ռանչոյում։ Պսակադրության արարողությանը ներկա է եղել նաև դերասանների 9 ամսական դուստրը, ով ևս կրել է սպիտակ զգեստ։
Տատյանա Նավկա և Դմիտրի Պեսկով
ՌԴ նախագահի 47–ամյա մամուլի քարտուղարի և հայտնի գեղասահորդուհու պսակադրության արարողությունը տեղի է ունեցել Սոչիի «Ռոդինա» հյուրանոցի տարածքում։ Նավկայի և Պեսկովի համար սա արդեն երրորդ ամուսնությունն է։ Միջոցառմանը մասնակցել են բազմաթիվ հայտնի քաղաքական գործիչներ, մարզիկներ և շոու բիզնեսի ներկայացուցիչներ, որոնց թվում են Յանա Ռուդկովսկայան, Վալենտին Յուդաշկինը, Աննա Սեմենովիչը, Ալյոնա Ապինան և Ալիկա Սմեխովան։ Պսակադրության արարողությունից հետո Նավկան նետել է հարսնացուի ծաղկեփունջը, որը բռնել է նրա քույրը։
Գայ Ռիչի և Ջեքի Էյնսլի
Զույգի պսակադրության արարողությունը կազմակերպվել է Անգլիայի Էշքոմբ կալվածքում։ Ռիչիին և Էնսլիին շնորհավորելու են եկել Ջեյսոն Սթեթհեմը, Բրեդ Փիթը, Դևիդ Բեքհեմը։ Կալվածքի տարածքում տեղադրվել են վրաններ` հատուկ աստղային հյուրերի հանգստի համար։ Զույգը պսակադրությունից առաջ հանդիպել է շուրջ 5 տարի և արդեն ունի երեք երեխա։
Պիեր Կազիրագի և Բեատրիս Բորրոմե
Մոնակոյի արքայազնի և իտալական արիստոկրատ ընտանիքին պատկանող Բորրոմեի հարսանեկան արարողությունը կազմակերպվել է Իզոլա Բելլա գեղատեսիլ կղզում։ Միջոցառմանը հրավիրվել է ավելի քան 700 մրդ։ Կազիրագին և Բորրոմեն իրենց ամուսնությունը տոնել են ավելի քան երկու շաբաթ։–0–
