Սատկել է Երևանի կենդանաբանական այգու ամուրյան վագրերից արուն՝ Նոբելը

ԵՐԵՎԱՆ, 21 հուլիսի./Նովոստի–Արմենիա/. Հանկարծամահ է եղել է Երևանի կենդանաբանական այգու ամուրյան վագրերից արուն՝ Նոբելը։

Այս մասին հաղորդում է այգու մամուլի ծառայությունը։

Նոբելը ծնվել էր Կալինինգրադի կենդանաբանական այգում 2001 թվականի օգոստոսի 25-ին: Մեկ ամսից պիտի լրանար զառամյալ արուի 18 տարին, եթե ծերությունը չսպառեր նրա կենսական ուժերը:

Նոբելը պատկանում էր վագրերի ամուրյան տեսակին: Հայրը Վիլիսն էր, իսկ մայրը՝ Պուրդան:

Նրա տոհմային համարն էր 4652-ը: ծ

Վայրի բնության մեջ վագրերն ապրում են միջինում 15 տարի, իսկ անազատության մեջ, բացառիկ դեպքերում, մինչև 25:

Նոբելը Երևանի կենդանաբանական այգի էր եկել 2005 թ.ի մայիսի 9-ին: Ընկերուհու՝ Գերտայի հետ նրանք, Նոբելի մեղքով, այդպես էլ սերունդ չտվեցին:

Կենդանու անկումը գրանցվել է այսօր՝ հուլիսի 20-ին, կեսօրին մոտ:

Նրան խնամողը նկատել էր ազատավանդակի տարածքում՝ անշարժ պառկած: Դին տեղափոխվել է Կենդանաբանական այգու կլինիկա, դիահերձաման արդյունքում արվել է նմուշառում օրգաններից (լյարդ, փայծախ, երիկամ և թոք), որոնք ըստ սահմանված կարգի ուղարկվել են Հանրապետական անասնաբուժասանիտարական և բուսասանիտարական լաբորատոր ծառայությունների կենտրոն՝ փորձաքննության:

«Անկման նախնական պատճառը, ըստ ԵԿԱ կենդանաբուժի, ծերությունն է», – նշվում է հաղորդագրության մեջ:–0–