Երևանի կենդանաբանական այգում գորշ արջ է սատկել. այգին պարզաբանում է (ՖՈՏՈ)
ԵՐԵՎԱՆ, 4 հոկտեմբերի. /Նովոստի–Արմենիա/. Երևանի կենդանաբանական այգում գրանցվել է գորշ արջի անկում, նշվում է այգու մամուլի ծառայության տարածած հաղորդագրության մեջ։
«Կենդանաբանական այգին ցավով է տեղեկացնում, որ ներտեսակային պայքարի հետևանքով գրանցվել է թվով 1 (մեկ) անդրկովկասյան գորշ արջի անկում», – նշվում է հաղորդագրության մեջ։
Արջերի ներտեսակային պայքարները կարող են դրսևորվել թե՛ բնության մեջ, թե՛ որոշ դեպքերում անազատ պայմաններում՝ կախված վերջիններիս սոցիալական խմբում առկա հիերարխիկ կառուցվածքից, կենդանու ինքնապաշտպան վարքագծից, բազմացման սեզոնին ընդառաջ կամ պայմանավորված այլ կենսաբանական գործոններով:
Թեպետ նման ներտեսակային պայքարներն ու վարքագծային դրսևորումները հատուկ են մեծ գիշատիչներին, սակայն տվյալ դեպքում այգում տարիներ շարունակ պահվող գորշ արջերը դրսևորել են անկանխատեսելի վարքագիծ՝ հարձակվելով շուրջ 6 ամիս հարևանությամբ ապրող մյուս էգ արջի վրա, որի հետևանքով գրանցվել է առավել թույլ տեսակի անկում՝ մահվան ելքով:
Ելնելով կենդանու հարձակման արագությունից և անկանխատեսելիությունից հնարավոր չի եղել արագ արձագանքման միջոցով կանխարգելել պայքարի ելքը՝ ժամանակավոր քնեցնելով կամ զատելով կենդանիներին:
Սա եզակի դեպք չէ կենդանաբանական այգիներում պահվող գիշատիչների համար, և կենդանաբանական այգիների պատմության ընթացքում գրանցվել ու գրանցվում են նմանատիպ դեպքեր: Ներկայումս Կենդանաբանական այգու տնօրինության կողմից կատարվում է փորձաքննություն դեպքի առնչությամբ», – նշվում է հաղորդագրության մեջ։
Երևանի կենդանաբանական այգում այս պահին ապրում են ընդհանուր թվով 17 անդրկովկասյան գորշ արջեր:–0–
