ԵՐԵՎԱՆ, 5 նոյեմբերի. /Նովոստի–Արմենիա/. ՀՀ կառավարությունն իր վրա կվերցնի Տուլայում գրանցված ՃՏՊ–ի զոհերի հուղարկավորության և տուժածների բուժման ծախսերը, հինգշաբթի կառավարության նիստի ժամանակ ասաց ՀՀ վարչապետ Հովիկ Աբրահամյանը։
«Մենք խորհրդակցել ենք ՀՀ նախագահ Սերժ Սարգսյանի հետ և որոշել, որ ողջ ծախսերը կհոգա կառավարությունը», – ասաց Աբրահամյանը։
Նա տեղեկացրեց, որ այս պահին Տուլայի մարզում են գտնվում ՀՀ տրանսպորտի և կապի նախարար Գագիկ Բեգլարյանն ու առողջապահության նախարար Արմեն Մուրադյանը, ովքեր տեղում օգնություն են ցուցաբերում բոլոր տուժածներին։ Վարչապետը շնորհակալություն հայտնեց նաև ռուս գործընկերներին աջակցություն ցուցաբերելու համար։
Նիստից առաջ կառավարության անդամները մեկ րոպե լռությամբ հարգեցին ՃՏՊ–ի զոհերի հիշատակը։
Տուլայի ՃՏՊ-ի վարորդը 2 ամսով կալանավորվել է>>
Նոյեմբերի 3-ին Ռուսաստանի Դաշնության Տուլա շրջանի Դոն ավտոմայրուղում, դեպի Հայաստանի Հանրապետություն ընթանալիս, վթարի է ենթարկվել ՀՀ-ում հաշվառված «Կինգ Դելյուքս» ՍՊԸ-ին պատկանող ավտոբուսը, որտեղ գտնվել է 63 մարդ, որոնցից երկուսը վարորդներն են եղել։ ՃՏՊ–ի հետևանքով զոհվել է ՀՀ ութ քաղաքացի, մոտ 40–ը ստացել են տարբեր աստիճանի մարմնական վնասվածքներ։–0–