ԵՐԵՎԱՆ, 23 հունիսի. /Նովոստի-Արմենիա/. Հայաստանի կրթության և գիտության նախարարությունը դիմել է երկրի արտգործնախարարությանը` միջնորդություն խնդրելով Հայաստանի բուհեր ավարտած իսրայելցի քաղաքացիներին ատամնաբույժների կեղծ դիպլոմներ հանձնելու հանգամանքները պարզելու հարցում։
Օրեր առաջ The Marker իսրայելական պարբերականը հայտնել է, որ իսրայելական ոստիկանությունը ստուգում է երկրի Առողջապահության նախարարության բողոքն առ այն, որ իսրայելցի ուսանողներին ատամնաբույժների կեղծ դիպլոմներ են տրվել։
Загружается новость ... "Лево"
Բողոքի հիմքում ընկած են արաբական հատվածի ատամնաբույժների միավորում ստացված վկայական ցուցմունքներն այն մասին, որ Իսևայելում աշխատում են գործակալներ, ովքեր որոնում են իսրայելցի արաբ ուսանողների, ովքեր արտերկիր` Հորդանան, Գերմանիա կամ Իտալիա են մեկնում ատամնաբույժի կամ բժիշկի կրթություն ստանալու, սակայն չեն հանձնում քննություններն ուսման առաջին կամ երկրորդ տարում։ Այդ ուսանողներին գործակալներն առաջարկում են ուսման մեկնել Հայաստան։
Առողջապահության նախարարությունում ստացված բազմաթիվ վկայությունները պատճառ են դարձել, որ արդեն մեկ տարուց ավելի նախարարությունը չի հաստատում հարյուրավոր բժիշկների կամ ատամնաբույժների` հայկական համալսարանների տրված դիպլոմները։ Ավելին, մի քանի ամիս առաջ Առողջապահության նախարարությունը նախազգուշացրել է Հայաստան մեկնել ծրագրող ուսանողներին, որ հայկական դիպլոմն ընդհանրապես կարող են անվավեր ճանաչել Իսրայելում։
«Հաշվի առնելով այն հանգամանքը, որ նման հրապարակումները ստվեր են գցում ոչ միայն Հայաստանի կրթական համակարգի, այլ նաև ողջ պետության միջազգային հեղինակության վրա, խնդրում ենք Ձեր միջնորդությունը`Իսրայելի համապատասխան կառույցներից խնդրի վերաբերյալ հնարավորինս մանրամասն, այդ թվում` բուհերի, դիպլոմների, շրջանավարտների ինքնության մասին տեղեկություններ ստանալու վերաբերյալ»,- նշվում է Հայաստանի ԿԳՆ` ուրբաթ տարածած հաղորդման մեջ։
Կրթության և գիտության նախարարի մամուլի խոսնակ Լուսինե Մարգարյանի տեղեկատվության համաձայն, համապատասխան տեղեկատվություն ստանալուց հետո ՀՀ կրթության և գիտության նախարարությունը հետամուտ է լինելու խնդրի վերաբերյալ ամբողջական և բազմակողմանի քննության անցկացմանը: -0-