Փաշինյան. Վաշինգտոնում հասկանում են Իրանի նշանակությունը Հայաստանի համար

ԵՐԵՎԱՆ,  1 սեպտեմբերի. /Նովոստի-Արմենիա/. Հայաստանի վարչապետ Նիկոլ Փաշինյանը Nouvelle d'Arménie պարբերականին տված հարցազրույցում պատասխանել է Իրանի դեմ ԱՄՆ-ի պատժամիջոցների հետևանքով Հայաստանի վրա ազդեցության մասին հարցին:

«Չեմ ուզում ամպագոռգոռ հայտարարություններ անել, բայց մեր դիվանագետներին հաջողվեց կարևոր հաղթանակ գրանցել այս ոլորտում` կարծես մեր ամերիկացի գործընկերները դրական են ընկալել այս հարցը: Նրանք սկսել են հասկանալ, որ Իրանը Վաշինգտոնի համար մի նշանակություն ունի, Հայաստանի համար` մեկ այլ»,- ասել է Փաշինյանը, ավելացնելով, որ դա չի նշանակում ամերիկյան կողմի վերաբերմունքի փոփոխոթյուն Իրանի նկատմամբ:

Փաշինյանը նշել է, որ այս պահին Հայաստանն ԱՄՆ-ի կողմից այդ հարցով որևէ ճնշման չի ենթարկվում:

«Հայաստանը ենթակա չէ ճնշման որպես երկիր, սակայն միջազգային հանրության մի մասն է` լինելով Իրանի հարևան: Ուզում եմ ասել, որ չկա միանշանակ և միաբովանդակ մոտեցում, և ես ուրախ եմ տեսնելու, որ մեր ամերիկացի գործընկերները, կարծես, ընկալել են այն համատեքստի խորությունը, որում գտնվում է Հայաստանը»,- ասել է վարչապետը: -0-