ՀՐԱՏԱՊ. Ռոբերտ Քոչարյանը կալանավորվեց. փաստաբան

ԵՐԵՎԱՆ, 28 հուլիսի. /Նովոստի-Արմենիա/. Ավարտվեց Երևանի Շենգավիթ վարչական շրջանի ընդհանուր իրավասության դատարանի նիստը, որն ուրբաթ առավոտից քննում էր ՀՀ նախկին նախագահ Ռոբերտ Քոչարյանի խափանման միջոցն ընտրելու հարցը։

Դատարանը բավարարեց քննիչի միջնորդությունը, Հայաստանի երկրորդ նախագահ Ռոբերտ Քոչարյանին երկու ամսով կալանավորելու վերաբերյալ, հայտնեց Քոչարյանի փաստաբան Արամ Օրբելյանը: Քոչարյանն այս պահից արդեն գտնվում է կալանավորի կարգավիճակում:

Հայաստանի երկրորդ նախագահ Ռոբերտ Քոչարյանին մեղադրանք է առաջադրվել Հայաստանի Հանրապետության սահմանադրական կարգը տապալելու համար: Նույն օրը միջնորդություն է ներկայացվել Երևան քաղաքի ընդհանուր իրավասության առաջին ատյանի դատարան` Ռոբերտ Քոչարյանի նկատմամբ կալանավորումը որպես խափանման միջոց ընտրելու համար:

«Լայն զանգվածների տրամադրությունը փորձում են տեղափոխել իրավական դաշտ, և ըստ էության, ստացվում է, որ 21,5% հավաքած Լևոն Տեր-Պետրոսյանը հաղթել է 2008-ի ընտրույթունները: Սա իրականությունից շատ-շատ հեռու է, որևէ առնչություն չունի և սա ակնհայտ քաղաքական հետապնդում է, վենդետա է թավշյա հեղափոխության, սիրո և համերաշխության կարգախոսի ներքո», - այսպես է որակել Ռոբերտ Քոչարյանն իրեն առաջադրված մեղադրանքը:

Հայկական ընդդիմությունը` առաջին նախագահ Լևոն Տեր–Պետրոսյանի գլխավորությամբ, ով առաջադրվել էր 2008 թ.–ի փետրվարի 19–ին կայացած նախագահական ընտրություններին և պարտվել էր, փետրվարի 20–ից Երևանի կենտրոնում անցկացնում էր հանրահավաքներ` դժգոհություն հայտնելով քվեարկության արդյունքներից։ Բողոքի ակցիաները 2008 թ.–ի մարտի 1–2–ը վերածվեցին անկարգությունների և իրավապահ ուժերի ու ցուցարարների միջև բախումների, ինչի հետևանքով զոհվեց 10 մարդ, ավելի քան 200–ը վիրավորվեց։

Շաբաթ օրը ժամը 12:00-ին Էրեբունի պլազայի 9-րդ հարկում տեղի կունենա մամուլի ասուլիս, որի ընթացքում Քոչարյանի փաստաբանները կպատասխանեն բոլոր հարցերին` գործի հետ կապված: -0-