ԵՐԵՎԱՆ, 16 դեկտեմբերի. /Նովոստի–Արմենիա/. Հայաստանի խորհրդարանն ուրբաթ արտահերթ նիստում երրորդ և վերջնական ընթերցմամբ ընդունեց «Հայաստանի քաղաքական կուսակցությունների մասին» սահմանադրական օրենքի նոր խմբագրումը, որը պարզեցնում է քաղաքական կուսակցությունների գրանցման և դրանց վերահսկողության կարգը։
Հայաստանի արդարադատության նախարար Արփինե Հովհաննիսյանը, լրացումները ներկայացնելով, նշեց, որ փոփոխությունները նախատեսված են սահմանադրական բարեփոխումներով և նախագահի որոշմամբ։
Նա նշեց, որ, գործող օրենսդրության համաձայն, կուսակցությունները գրանցման պահին պետք է ունենան առնվազն 200 անդամներ և 6 ամսվա ընթացքում նրանց թիվը պետք է հասնի մինչև 2 հազարի։
«Օրենքի նոր տարբերակը նախատեսում է հետևյալ մեխանիզմը`կուսակցություն ստեղծելու մասին որոշումն ընդունվում է 100 մարդուց բաղկացած հիմնադիր համագումարում, ինչից հետո վեց ամիսների ընթացքում, այսինքն, կուսակցության գրանցման պահին, անդամների թիվը չպետք է պակաս լինի 800–ից»,– ասաց Հովհաննիսյանը։
Օրենքով նախատեսված է նաև սեռերի հավասարության սկզբունքի սահմանում և հաշմանդամների նկատմամբ խտրականության անթույլատրելիություն։
Նախարարի խոսքով, պարզեցվում է նաև մարզերում ստորաբաժանումների մեկ երրորդի պարտադիր առկայության պահանջը` վեցամսյա ժամկետում երկրի ամբողջ տարածքում դրանց հետագա տարածման պահանջով։ Մասնավորապես, նոր խմբագրման օրենքում կուսակցությունները գրանցման պահին պետք է ունենան մարզային ստորաբաժանումներ մարզերի մեկ երրորդում։ Ընդ որում` խոսքը գնում է ինչպես Երևանի, այնպես էլ երկրի մարզերի մասին։
Նա միաժամանակ նշեց, որ հստակեցվել են նաև գրանցումից հրաժարվելու, գործունեության արգելքի պայմանները և այլ հարցեր։
Օրենքով նաև նախատեսված է, որ քաղաքական կուսակցությունը ստեղծվում է քաղաքացիների նախաձեռնությամբ ոչ պակաս քան 100 մարդու քվորումով հիմնադիր համագումարում։ Այնտեղ ընդունվում են նաև կուսակցության ծրագիրն ու կանոնադրությունը։ Միաժամանակ, պետական ֆինանսավորման համար քաղաքական կուսակցությունը պետք է խորհրդարանական ընտրություններում հավաքի ոչ պակաս քան 3 տոկոս։
Հիմնադիր համագումարը պետք է անցկացվի տարին առնվազն երկու անգամ։
«Խորհրդարանական ընտրություններում 3–տոկոսանոց արգելքը հաղթահարած բոլոր կուսակցություններին տարեկան կհատկացվի, ընդհանուր առմամբ, 40 մլն դրամ (82 հազար դոլար), ինչը 20-25 մլն դրամով ավելի է, քան նախկինում»,– ասաց Հովհաննիսյանը։
Փոփոխություններով կարգավորվում է պարզեցված համակարգով կուսակցությունների լուծարման և տասը տարվա ընթացքում ընտրությունների չմասնակցելու դեպքում նրանց գործունեության դադարեցման գործընթացը։
Նոր կուսակցություններին կտրամադրվի գրանցման մի տարվա ժամկետ հիմնադիր համագումարի պահից։ Նախատեսվում է նաև կուսակցությունների անդամագրման սահմանափակում «ուժայինների» համար։
Միաժամանակ, կուսակցության գործունեությունը կարող է դադարեցվել, եթե այն օրենքի կոպիտ խախտում է թույլ տվել, մասնավորապես, ֆինանսական հաշվետվության կարգի խախտում, սահմանադրական կարգի բռնի տապալման կոչ է անում։
Ներկայում Հայաստանում գրանցված է 79 կուսակցություն։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում